Máskeý mańyndaǵy «Krokýs Sıtı Hol» konsert zalynda bolǵan terakt isi boıynsha sot úkimi shyqty. Teraktini tikeleı oryndaǵandar ómir boıyna bas bostandyǵynan aıyryldy, dep habarlaıdy Dalanews.kz.

Mash málimetinshe, Ekinshi Batys okrýgtik áskerı sot Dalerdjon Mırzoev, Saıdakramı Rachabalızode, Shamsıdın Farıdýnı jáne Mýhammadsobır Faızovty ómir boıyna bas bostandyǵynan aıyrý jazasyna kesken.

İs boıynsha shamamen 2,3 myń adam jábirlenýshi retinde tanylǵan.

Máskeý oblysyndaǵy «Krokýs Sıtı Hol» konsert zalynda terakt 2024 jylǵy 22 naýryzda bolǵan. Tórt qarýly adam konsert zalyna basyp kirip, atys uıymdastyryp, keıin ǵımaratty órtep jibergen.

Saldarynan 145 adam qaza taýyp, 550-den astam adam jaraqat alǵan.

Kómekteskender de ómir boıyna sottaldy

Teraktini uıymdastyrýǵa kómektesti dep tanylǵan taǵy 11 adam da ómir boıyna bas bostandyǵynan aıyryldy:

– Ýmedjon Solıev
– Mýstakım Solıev
– Shahromdjon Gadoev
– Zýbaıdýllo Ismoılov
– Hýseın Hamıdov
– Mýhammad Sharıpzoda
– Iakýbdjonı Iýsýfzoda
– Nazrımad Lýtfýlloı
– Djýmahon Kýrbonov
– Hýsen Medov
– Djabraıl Aýshev

Terrorısterge aq tústi Renault Symbol avtokóligin jáne páter bergen Isroıl, Dılovar jáne Amınchon Islomovtar 19 jyl 11 aıǵa sottaldy.

Al Máskeý oblysynda aıyptalýshylarǵa páter jalǵa bergen Alısher Kasımov 22 jyl 10 aıǵa bas bostandyǵynan aıyryldy.