Resei bas prokýrory Igor Krasnov Dýshanbege barǵan saparynda postsovettik elderdiń azamattary Ýkrainada orys armiiasyna qarsy soǵysyp júr dep málimdedi.
Reseidiń memlekettik TASS aqparat agenttiginiń habarlaýynsha, Krasnov tájikstandyq áriptesi Iýsýf Rahmonmen kezdeskende bylai degen: "Qazir Ýkrainadaǵy jaǵdaiǵa bailanysty qaýip-qater tek órship jatyr. Búgin bizdiń elder jańa qaýip-qaterdiń aldynda tur. Sebebi, TMD elderiniń azamattary Ýkrainada orys armiiasyna qarsy soǵysyp júr".
Krasnov bul qaýiptiń aldyn alýy úshin quqyq qorǵaý organdary ózara áreket etýi qajet degen.
Bul málimdemege tájik tarapy ne dep jaýap bergeni belgisiz, sebebi tájik aqparat quraldarynda bul kezdesý jaily jazylmaǵan.
Reseilik BAQ-tyń málimetinshe, 26 shildede Dýshanbede Igor Krasnov pen Iýsýf Rahmon eki mekeme arasyndaǵy 2024 jylǵa deiin terrorizm jáne ekstremizmge qarsy, qylmystyq áreketterge qarsy birlesip kúresý jóninde kelisimge qol qoiǵan.
Buǵan deiin baspasóz betinde Arqalyqtyń týmasy, ulty qazaq Jasulan Dúisembinniń úsh jyl buryn Ýkrainaǵa kóship baryp, qazir sol eldiń áskeri sapynda Resei basqynshylyǵyna qarsy kúresip júrgeni habarlanǵan. Ýkrainalyq áielmen shańyraq qurǵan Dúisembinniń eki balasy bar. Ol áleýmettik jelilerdegi paraqshalarynda maidandaǵy ahýal, Qazaqstandaǵy saiasi júie týraly oi-pikirin jii bildirip turady.
"Ýkrainada turyp jatqanda osy elge terror jasap kelgen Reseimen jaǵdaidy zerttei bastadym. Meniń eki balam bar, olardyń boiynda ýkrain qany bar. Qudai saqtasyn, olardyń amandyǵyn qorǵaý – meniń boryshym.
Buǵan qosa, men Reseidiń tek Ýkrainamen toqtamaitynyn túsindim. Sondyqtan Reseidiń ary qarai meniń Qazaqstanyma bet almaýy úshin de bar kúshimdi salýym kerek dep oilaimyn.
Ýkrainada áskeri kelisim-shartqa qol qoiǵan soń, maidanǵa kelgennen keiin anama qysym jasala bastady. Ony túrmege otyrǵyzamyz dep qorqytqan. Anamdy tynyshtandyryp, bul óz tańdaýym ekenin, oǵan qatysy joǵyn aittym. Qazir jaqyndarymnyń qaýipsizdigi úshin olarmen sirek habarlasamyn. Tek kei adamdar arqyly amandyǵymdy bildirip turamyn. Olardy qorqytýǵa eshkimniń haqysy joq", – degen edi Jasulan Dúisembin Azattyqqa bergen suhbatynda.
