AQSh Ózbekstanmen belsendi túrde syndarly saiasi dialog júrgizýge daiyn. 29 qarashada Tashkentte Ózbekstan syrtqy ister ministriniń birinshi orynbasary Fýrkat Sydyqov pen AQSh elshisi Djonatan Henik kezdesýinde osyndai málimdeme jasaldy.
SIM baspasóz qyzmetiniń habarlaýynsha, júzdesýde ózbek-amerika strategiialyq áriptestiginiń qazirgi jaǵdaiy men bolashaǵy sóz boldy. Taraptar jospardaǵy is-sharalardy, sonyń ishinde Ózbekstan men AQSh arasyndaǵy strategiialyq áriptestik dialogynyń kezekti otyrysyn talqylady.
Sonymen birge dialog barysynda saýda men investitsiia, innovatsiia, aýyl sharýashylyǵy, energetika jáne basqa da salalardaǵy qarym-qatynastardy nyǵaitý jóninde usynystar qaraldy.
Elshi Henik AQSh ákimshiligi Ózbekstanǵa qarjylai, tehnikalyq kómek kórsete beretinin, koronavirýs indetimen kúreste qaitarymsyz kómegin aiamaitynyn aitty.
Bunyń aldynda Resei memlekettik dýmasynyń baspasóz qyzmeti spiker Viacheslav Volodin Ózbekstanǵa AQSh-pen áriptestiginiń saldary jóninde eskertti dep habarlaǵan. Volodinniń málimdeýinshe, "AQSh pen onyń Eýropadaǵy strategiialyq áriptesteri arasyndaǵy qarym-qatynastyń nátijesi Ózbekstan úshin Vashingtonmen áriptestiginiń saldaryn baǵalaýǵa mysal bolady".
Dýma taratqan málimetke qaraǵanda, Volodin Eýropa úshin mundai "strategiialyq áriptestiktiń sońy" ekonomikadaǵy problemalarmen aiaqtaldy degen.
"Mundaǵy adamdar dana, saýatty - bunyń saldary nemen aiaqtalatynyn túsinedi", — degen AQSh ókilderiniń aimaqqa jii keletinine qatysty pikir bildirgen Dýma spikeri.
Volodinniń Ózbekstan men AQSh áriptestigi tóńireginde ses kórsete sóilegeni áleýmettik jelilerde qyzý talqylanyp jatyr. Jeli qoldanýshylardyń deni spiker sózin egemen memlekettiń ishki isine aralasý dep baǵalaǵan.
https://dalanews.kz/bas-takyryp/84646-qazaqstan-zhane-magatye-bizding-elding-aye
https://dalanews.kz/news/84825-astanada-300-den-astam-ulesker-baspanasy
