Qýandyq Bishimbaevtyń isine qatysty sot jaryssózderi ótip jatyr. Eń aldymen memlekettik aiyptaýshy Aijan Aimaǵanova sóz sóiledi, - dep habarlaidy Dalanews.kz.
Sotta Aimaǵanova Saltanat Núkenova men qurbylarynyń hatyn eske aldy. Onda Núkenova Bishimbaev onyń ár qadamyn ańdyp otyrǵany, Saltanat únemi qorqyp júretinin aitqan bolatyn.
Prokýror mundai jaǵdaiǵa birinshi ret tap bolǵanyn aitty.
"Esi durys, intellekti damyǵan, al syrttai jaqsy kórinetin adamda basty nárse – júrek joq. Onyń kózinen esh ókinish, janashyrlyq, táýbege kelýshilik kórmedik", – dedi prokýror.
Memlekettik aiyptaýshy Saltanat basynan 12-13 ret soqqy alǵanyn atap ótti.
"Bishimbaev bizge Saltanattyń basyn dárethanaǵa qalai urǵanyn, sodan keiin edenge qaita-qaita qulaǵanyn aityp berdi. Biraq saraptamalar kerisinshe bolyp otyr", – dedi ol.
Eske salaiyq, buǵan deiin sot-meditsinalyq saraptama qyzmetkeri Tahir Halimnazarov Saltanat Núkenova qandai jaraqattar alǵanyn manekende kórsetken bolatyn.
Tahir Halimnazarovtyń sózinshe, bul jaraqattar Núkenovanyń máiitin saraptaý nátijesinde anyqtaldy.Iaǵni, alǵashqy saraptamany júrgizgen sarapshylar anyqtaǵan. Bul jaraqattar sarapshynyń qorytyndysynda sipattalǵan. Sarapshynyń sózinshe, munyń bári jalpylama bas jaraqaty bolyp sanalady. Oǵan betindegi jaraqattar da, bas súiegindegi jaraqattar da jatady.
Sot meditsinasynda bul jaraqattardyń bári syrtqy áserdiń kesirinen bolǵan zaqymdaný retinde qarastyrylady.
Tahir Halimnazarovtyń sózinshe, ólimniń sebebin aitqan kezde osy jaraqattardyń bárin qarastyrý kerek. Olardyń árqaisyn bólek qarastyrýǵa bolmaidy.
Sarapshy qulaýdan alǵan jaraqattar bolmaǵanyn aitady. Al Bishimbaev Núkenova qabyrǵaǵa soǵylyp, artynsha ýnitazǵa qulap túskenin aitqan bolatyn. Sonymen qatar, sot-meditsinalyq sarapshy Saltanat Núkenovanyń basyndaǵy sýbdýraldy gematomanyń mólsheri 230 gramm bolǵan. Bul ólimge ákeledi.
