Májilis depýtaty Nurtai Sabilianov "Ýáde" baǵdarlamasynda Shyǵys Qazaqstan jáne Abai oblystaryndaǵy sheneýnikterdiń toiymsyzdyǵyn synady, - dep habarlaidy Dalanews.kz.
Depýtat kezinde bir oblys ekige bólingende, birneshe mańyzdy nysannyń jumysy bitpei qalǵanyn jetkizdi.
"Shyǵys Qazaqstan oblysynan Abai oblysy bólingen kezde kóptegen bitpei qalǵan obektiler Abai oblysynda qalyp qaldy. Qarajat igerilip ketti. Ol obektiler - eldi mekenderdi aýyzsýmen qamtamasyz etý jobalary, mektepter salý, joldardy salý, áli kúnge deiin bitpei jatqandary bar. Úrjar aýdany boiynsha 7 aýyldyń sýy áli bitken joq. 4-5 jyl boldy, qarjylandyrylyp kele jatyr", - deidi ol.
Sonymen qatar, Sabilianov "bul iste óńirdi talai jyl basqarǵan Danial Ahmetovti jaýapkershilikke tartý kerek pe?" degen saýalǵa jaýap berdi.
"Aýdan ákimi men oblys ákimi jaýapkershilikke tartylýy kerek. Sol kezde aýdan ákimi kim boldy? Oblys ákimi, mysaly, Ahmetov boldy.
Kezinde Aiagóz aýdanyna 2 jarym milliard aqsha bólingen kezde jemqorlyqqa qarsy agenttikke saýal jiberip, basqa da quqyq qorǵaý organdaryna saýal jiberip, teksertip, oǵan qylmystyq is qozǵalyp, aqsha urlanǵany, tiimsiz jumsalǵany - bári anyqtalǵan bolatyn. Ainalyp kelgende ákim emes, sol ákimdikte isteitin Turǵyn úi kommýnaldyq sharýashylyǵynyń basshysy ǵana úsh jylǵa bas bostandyǵynan aiyryldy. Ol durys emes. Memlekettiń qarajaty da joq, sol qarajatqa salynǵan obekti de joq. Onda Aiagóz qalasynyń sýy, káriz júiesi bolǵan. Odan keiin Qopa, Ai degen aýyldarǵa sýǵa aqsha bólingen. Sol jumys áli aiaqtalǵan joq. Óitkeni qylmystyq is keiin bitti. Qaita jobalyq qujat jasaldy, endi qaita qarjylandyrýǵa 2024 jylǵa aqsha bóldik", - deidi Sabilianov.
Depýtat óńirdegi sheneýnikterdiń toiymsyzdyǵyna shúilikti.
"Kózderine shel bitken, toimaidy, ala bersem dep oilaidy. Shyǵys Qazaqstannyń azamattary kimniń ne alatynyn, qai jerde qandai ákim qandai jobadan múddesi bar ekenin biledi. Ony aityp ta, usynyp ta jatyr. Ainalyp kelgende sybailys jemqorlyq, bir-birimen bailanys, quqyq qorǵaý organdary da olardy qorǵap shyǵa keledi", - dedi ol.
Aita keteiik, buǵan deiin Ahmetov "Qazaqstan Respýblikasy jeńil atletika federatsiiasy" RQU prezidenti bolyp taǵaiyndaldy.
Ol jýyrda ǵana Astanada jeńil atletikadan Ámin Tuiaqov júldesine arnalǵan Astana Indoor Meet halyqaralyq týrniri aiasynda kózge túsip qalǵan edi. Derekterge súiensek, eks-sheneýnik jeńil atletika federatsiiasynyń prezidenti retinde barǵan. Shyǵys Qazaqstandy tapjylmai 9 jyl basqarǵan eks-ákim osylai sportty tizgindeýge oiysypty.
