Kozachkovty qamaý merzimi 18 naýryzǵa deiin uzartyldy
"30 qańtarda sotqa deiingi tergeý organynyń ótinishi qanaǵattandyrydyp, Kozachkovtyń qamaýdaǵy merzimi úsh aiǵa – 2023 jyldyń 18 naýryzyna deiin uzartyldy", - dep jazylǵan sottyń baspasóz qyzmeti taratqan málimdemede.
18 jeltoqsanda qarjy monitoring agenttigi jýrnalist, Kozachkov offside telegram-arnasynyń avtory Mihail Kozachkovtyń ustalǵanyn habarlaǵan. Ol "Bolat Nazarbaevtyń kómekshisi" dep atalǵan Eldos Qospaevtyń qylmystyq tobyna reiderlik jasaýǵa kómektesti degen kúdikke ilingen. Agenttik ókilderiniń aitýynsha, Qospaev "reiderlik qurbandaryna aqparattyq shabýyl jasaý úshin Kozachkovtyń qyzmetine júgingen". Kozachkov sol úshin "qylmystyq top múshelerinen" 52 mln teńge (112 myń dollar) syiaqy alǵan dep aitylady. Jýrnalistiń áriptesteri Kozachkovty kásibi qyzmeti úshin qýdalap otyr dep málimdedi.
19 jeltoqsanda keshke jýrnalist Vadim Boreiko Facebook paraqshasynda áriptesi Kozachkovtyń málimdemesin jariialady. Onda málimdeme avtory óziniń ustalýyn "qarjy monitoring agenttiginiń jetekshisi Janat Elimanovtyń jeke maqsatta kek alǵysy kelgendigimen" bailanystyrǵan. Málimdeme avtorynyń aitýynsha, ol Elimanovtyń "áieli týraly maqala jazǵandyqtan" agenttiktiń ózin túrmege "japqysy keletini" jóninde birneshe ret habar alǵan.
Qarjy monitoring agenttiginiń jetekshisi Janat Elimanov jýrnalist atynan taratylǵan málimdemege reaktsiia bildirmedi.
20 jeltoqsanda bas prokýratýra jýrnalist Mihail Kozachkovtyń isi "prokýratýra organdarynyń baqylaýynda bolady" dep aitqan.
Kozachkovtyń ustalǵan soń elde ondaǵan basylym men media uiymdar Qazaqstan prezidenti Qasym-Jomart Toqaevqa qaiyrylyp, jýrnalisti bosatýǵa shaqyrǵan edi.
Al Qazaqstan jýrnalister odaǵy "organdardy el zańyn saqtaýǵa", "Kozachkovtyń isin jan-jaqty, obektivti túrde qaraýǵa" shaqyrǵan. "Ádil sóz" jýrnalister quqyǵyn qorǵaý qory "Kozachkovtyń kuqyǵy óreskel buzylǵanyn" málimdep, ony bosatýdy surady.
Niý-Iorkte ornalasqan Jýrnalisterdi qorǵaý komiteti (CPJ) Qazaqstanda korrýptsiialyq ister jaidy jazyp júrgen jýrnalistiń ustalǵanyna alańdaýshylyq bildirdi.
Qazaqstan prezidentiniń baspasóz hatshysy Rýslan Jeldibai "bul is is Qazaqstan zańyna sáikes teń quqyqtar sheńberinde qaralýǵa tiis" dep jazdy.
