Qasym-Jomart Toqaev Ulttyq quryltaida jedel járdem jáne qoǵamdyq kólik júrgizýshilerine shabýyl jasaǵandar týraly aitty, - dep habarlaidy Dalanews.kz.
"Turmystyq zorlyq-zombylyq, býlling pen agressiia da qazirgi ýaqyttaǵy qaterli úrdis. Ashyǵyn aitsaq, qoǵamda qatigezdik kúsheiip barady. Bireýge til tigizip, ar-namysyn taptap, tipti, uryp-soǵýǵa daiyn turatyndar az emes.
Jedel járdem jáne qoǵamdyq kólik júrgizýshilerine shabýyl jasalǵanyn bilesizder. Adamǵa álimjettik kórsetý, qorlaý durys emes. Mundai teris áreketterge kóz juma qaraýǵa bolmaidy. "Aýrýyn jasyrǵan óledi". Sondyqtan biz osy qoǵamdyq dertti jasyrmai, ashyq aitýymyz kerek.
Azamattarymyz úide de, túzde de ózin qaýipsiz sezinýge tiis. Bir sózben, qaýipsiz ortada ómir súrýi kerek. Zań men tártip qatań saqtalýǵa tiis, iaǵni qoǵamda zań ústemdigi bolýy qajet. Eń bastysy, biz meiirimdi ári mádenietti urpaq tárbieleýimiz kerek.
Taǵy bir kesel, bul – vandalizm. Ókinishke qarai, qoǵamdyq múlikten bastap, myńjyldyq mádeni muralarǵa deiin – bárin jappai búldirý keiingi kezde ádetke ainalǵan. Býrabaidaǵy Jumbaqtasty, Baianaýyldaǵy Kempirtasty qarańyzdar. Eń jaýhar jerlerimizdiń sulýlyǵy shimaidyń astynda qalyp jatyr. Úidegi liftini, aýladaǵy oiyn alańyn, kóshedegi aialdamany qiratýdyń qandai qisyny bar?! Munyń bári – baryp turǵan tártipsizdik, mádenietsizdik.
Órkenietti eldiń árbir azamaty qoǵam múlkin óz múlkindei qorǵaýy kerek. Dúnie júzinde, naqty aitqanda, Japoniiada, Ońtústik Koreiada, Qytaida, Singapýrda jaǵymdy mysaldar kóp, osy elder kópke úlgi bolyp otyr. Al biz nege olardan kem bolýymyz kerek?" - dedi ol.
