Qazaqstanda kosmetologiialyq operatsiialardan keiin patsientterdiń kóz jumýyna bailanysty jekemenshik klinikalardy tekserý kúsheitilýi múmkin. Bul týraly Senat kýlýarynda Meditsinalyq jáne farmatsevtikalyq baqylaý komitetiniń tóraǵasy Baýyrjan Júsipov málimdedi, dep habarlaidy dalanews.kz.
Onyń aitýynsha, Almaty men Aqtaýdaǵy jekemenshik klinikalarǵa qatysty tekserý materialdary quqyqtyq baǵa berý úshin prokýratýra men quqyq qorǵaý organdaryna joldanǵan.
– Materialdar prokýratýraǵa jáne quqyq qorǵaý organdaryna quqyqtyq baǵa berý úshin berildi. Sondyqtan nátijeleri olar qaraǵannan keiin jariialanady, – dedi Júsipov.
Komitet tóraǵasy tekserý barysynda klinikalar qyzmetinen qandai da bir zańbuzýshylyqtar anyqtalǵan-anyqtalmaǵanyn naqtylamady.
Sonymen qatar, onyń sózinshe, Almatydaǵy jekemenshik klinikalardyń birine arnaiy komissiia tekserýge kirisken.
– Qazir arnaiy komissiia osy jekemenshik klinikaǵa kirip jatyr. Tekserý qorytyndysy boiynsha qosymsha aqparat beremiz. Komissiia quramyn jasaqtadyq, onyń ishinde táýelsiz sarapshylar bar. Olar barlyq isti, materialdardy, sonyń ishinde meditsinalyq tarihty tolyq zertteidi. Onyń óz tártibi bar, – dep túsindirdi komitet basshysy.
Qazirgi ýaqytta Qazaqstanda plastikalyq operatsiia jasaityn shamamen 247 jekemenshik klinika jumys isteidi.
Eske salsaq, 4 sáýirde Mańǵystaý oblystyq máslihatynyń burynǵy depýtaty, 49 jastaǵy Erbol Aitýov «Qasiet» jekemenshik klinikasyna júgingen. Oǵan liposaktsiia jasalyp, keiin komaǵa túsip, kóz jumǵan.
Al 15 mamyrda Almatyda bloger ári kásipker Sáýle Ermahanova da liposaktsiia operatsiiasynan keiin qaitys boldy. Bul oqiǵalar qoǵamda plastikalyq operatsiialardyń qaýipsizdigi men jekemenshik klinikalar jumysyna qatysty suraqtardy qaita kóterdi.
