Ministrliktiń sársenbi kúni tańerteń jariialaǵan dereginshe, 30 maýsymda elde 1604 adamnan koronavirýs anyqtalǵan. Bir táýlikte 550 adam dertten jazylǵan. Ótken táýlikte qansha adam qaitys bolǵany týraly áli resmi aqparat joq. Virýs juqtyrǵandardyń jalpy sany – 41055 adam.
Bilik virýs juqtyrǵandardy virýs belgisiniń bar-joǵyna qarai «aýyrǵandar» jáne «tasymaldaýshylar» dep eki bóleý sanaýdy 3 maýsymda bastaǵan edi. Biraq COVID-19 juqtyrǵandardyń negizgi statistikasyna tek «aýyrǵandardy» qosyp otyrdy. Virýstyń álem boiynsha taraýyn zerttep otyrǵan uiymdar men institýttar Qazaqstannyń resmi deregine súienip, «aýyrǵandardyń» sanyn virýs juqtyrǵandardyń jalpy sany retinde kórsetip otyrdy.
Kei sarapshylar «Qazaqstan biligi muny koronavirýstyń taraýyn jaǵymdy etip kórsetý úshin jasap otyr» degen pikir aitty.
QR Densaýlyq saqtaý ministrligi aýrý belgisi barlar men joqtardy bólek sanaý «halyqaralyq tájiribe» degen bolatyn. Azattyq ministrlikten ondai tájiribe qai elderde qoldanylatynyn surady. Ministrlik atynan túsinikteme bergen Qazaqstannyń bas infektsionisi Dinagúl Baesheva «simptomy joqtardy statistikaǵa qospaý álemniń kóp elinde, sonyń ishinde Shvetsiia, Belarýs, Italiiada bar» degen edi. Azattyq habarlasqan Shvetsiia men Italiianyń densaýlyq saqtaý ministrlikteri eki elde de virýs juqtyrǵandardy simptomy bar-joq dep bólmei birge esepteitinin málimdedi.
Al Belarýs densaýlyq saqtaý ministrliginen Baeshevanyń aitqanyna qatysty qandai da bir pikir alý múmkin bolmady. Keibir sarapshylar koronavirýsqa bailanysty karantin jariialamaǵan, shekarasyn jappaǵan Belarýstegi koronavirýs juqtyrǵandar men qaitys bolǵandar sanyna qatysty kóp kúdik keltiredi.
Qazaqstan densaýlyq saqtaý ministrliginiń búgingi dereginshe, 30 maýsym kúni elde 1604 adamnan koronavirýs anyqtaldy. Bir táýlikte 550 adam jazylyp shyqty. Qaitys bolǵandardyń sany áli aitylmady. Virýs juqtyrǵandardyń jalpy sany – 41 055.
Álem elderin virýs juqtyrǵan adamdardyń sanyna qarai nómirlep otyrǵan worldometers.info saity Qazaqstan deregin áli jańartpady. Qazirgi derek Qazaqstannyń osyǵan deiingi ádisi boiynsha sanalǵan statistikany kórsetip tur. Ol boiynsha Qazaqstan álem elderi arasynda 51-orynda, al jańa málimetke súiensek – 37-orynda tur.
18 maýsymda Qazaqstan densaýlyq saqtaý ministriniń orynbasary Lázzat Aqtaeva koronavirýstan qaitys bolǵandar tizimine kirmegen 54 ólim tirkelgenin aitqan. Sheneýnik bul naýqastar koronavirýs juqtyrǵanmen «infarkt, insýlt, onkologiialyq aýrýlar sekildi ózge negizgi dertterden qaitys bolǵan» dep túsindirgen. Al Dúniejúzilik densaýlyq saqtaý uiymy álem elderine qaitys bolǵan adamdardan (jazataiym oqiǵadan jáne infarkten qaitqandardan basqasyn) koronavirýs anyqtalǵan jaǵdaida olardy resmi statistikaǵa qosýdy usynǵan.
