25 jeltoqsan kúni QR Mádeniet jáne aqparat ministrliginiń uiymdastyrýymen Halyq jazýshysy, Memlekettiń syilyqtyń laýreaty, kórnekti aqyn Fariza Ońǵarsynovanyń 85 jyldyǵyna arnalǵan «Poeziia padishasy» atty saltanatty jiyn ótti, dep habarlaidy Dalanews.kz.
Jiynǵa QR Mádeniet jáne aqparat ministri Aida Balaeva, Qazaqstan Jazýshylar odaǵynyń tóraǵasy Mereke Qulkenov, Memleket jáne qoǵam qairatkerleri Baqtyqoja Izmuhambetov, Qýanysh Sultanov pen ziialy qaýym ókilderi, aqynnyń týǵan týystary qatysty.
Saltanatty sharada alǵash sóz alǵan QR Mádeniet jáne aqparat ministri Aida Balaeva:
Búgin – Fariza apamyzdyń týǵan kúni. Aqyn kózi tiri bolsa 85 jasqa tolar edi. Búgingi is-sharany Ulttyq arhivte ótkizýdiń ózindik máni bar. Sebebi osydan az ýaqyt buryn Fariza Ońǵarsynovanyń jeke qorynan qoljazbalary men qundy qujattar arhivke tabystalǵan edi. Muqaǵali Maqatev Fariza Ońǵarsynovaǵa arnaǵan jyrynda “arhivterden tabylarmyz…” degen sóz aityp edi. Aqynnyń altyn qor, asyl muralary bolashaq farizatanýshylarǵa ólsheýsiz azyq bolyp, jańa múmkindikterge jol ashady dep senemin. Fariza Ońǵarsynovanyń ónegeli ómir jolyn, óshpes murasyn ult bolyp ulyqtap, keiingi urpaqqa jetkizý – barshamyzǵa ortaq paryz, - dep saliqaly sóz sóiledi.
Budan soń memlekettik tapsyryspen jaryq kórgen «Fariza Ońǵarsynova «Tańdamaly» kitabynyń tusaýkeser rásimi ótti.
Sondai-aq Qazaqstan Respýblikasy Ulttyq arhiviniń direktory S.Nurlanova aqynnyń uly Almas Ońǵarsynovqa Fariza Ońǵarsynovanyń jeke tektik qorynyń ashylýyn kýálandyratyn sertifikatty tabystady.
Aita keteiik saltanatty jiyn aiasynda Fariza Ońǵarsynovanyń ómir derekterinen syr sherter qujattyq kórme uiymdastyryldy. Kórmege aqynnyń óz qolymen jazǵan otbasylyq shejiresi men ómirbaiany, «Kógershinderim» óleńder jinaǵynan qoljazbalar, «Dástúrdi bilesiń be?» t.b. oi-tolǵamdary, M. Maqataevtyń 60 jyldyǵynda sóilegen sózi, notalary men buryn-sońdy jariialanbaǵan fotosýretteri jáne hattarynan jinaqtalǵan 50-ge jýyq qujattary qoiyldy.
