– Búgingi kún barshamyz úshin – erekshe oqıǵalarǵa toly boldy. Jańa ǵana sizdermen birge Saltanat saraıynyń ashylýyna kýá boldyq. Endi, mine, irgeles ornalasqan Kórme pavılony da esigin aıqara ashyp otyr. Munda qalalyq, oblystyq, respýblıkalyq, tipti halyqaralyq sharalardy da ótkizýge bolady. Osy ǵımaratty ashý arqyly kórme qyzmetiniń jańa múmkindikterine jol ashýmen qatar, ózimizde óndiriletin taýarlar men qyzmetterdi keshen qabyrǵasynda kópshilikke usyný arqyly óńirimizdiń ınvestısıalyq tartymdylyǵyn da eseleı alamyz. Qalamyz mundaı Kórme pavılonymen uıalmaı maqtana alatynyna senimdimin, – dedi A. Batalov Kórme pavılonynyń ashylý saltanatynda.
Osy kúni sharaǵa kelgenderdiń nazaryna otandyq taýar óndirýshiler taýarlarynyń kórmesi usynyldy. Olardyń qatarynda «Qaınar AKB» akýmýlátor zaýyty, «Almaty boıaýlary» JSHS, «Hamle Kompanı LTD» JSHS, «Metakon» JSHS, sút jáne sút taǵamdaryn shyǵaratyn «Arqabaı» zaýyty, «JLC sút» zaýyty, krahmal-sirne zaýyty jáne t.b. bar.
Atap ótsek, ǵımarattyń ekinshi qabatynda Kásipkerler palatasy ornalasatyn bolady. Kásipkerler palatasynyń bıznes-treneri bıznes-mektebiniń jumysymen tanystyryp, sheberhanalar men zamanaýı fotolaboratorıalar jáne basqa da qyzmetti týraly baıandap berdi.
Jalpy Kórme kesheniniń qurylysy 2016 jylǵy aqpanda bastalǵan. Jalpy quny – 1227,686 myń teńge. Syıymdylyǵy – 260 adam. Ǵımarattyń jalpy alańy – 4437,8 m2.Birinshi qabat túgelimen kórme ótkizýge arnalady. Kórme zaly kesheniniń edeni etnıkalyq stıldegi pannomen bezendirilgen.
https://dalanews.kz/32065
