– بۇگىنگى كۇن بارشامىز ءۇشىن – ەرەكشە وقيعالارعا تولى بولدى. جاڭا عانا سىزدەرمەن بىرگە سالتانات سارايىنىڭ اشىلۋىنا كۋا بولدىق. ەندى، مىنە، ىرگەلەس ورنالاسقان كورمە پاۆيلونى دا ەسىگىن ايقارا اشىپ وتىر. مۇندا قالالىق، وبلىستىق، رەسپۋبليكالىق، ءتىپتى حالىقارالىق شارالاردى دا وتكىزۋگە بولادى. وسى عيماراتتى اشۋ ارقىلى كورمە قىزمەتىنىڭ جاڭا مۇمكىندىكتەرىنە جول اشۋمەن قاتار، وزىمىزدە وندىرىلەتىن تاۋارلار مەن قىزمەتتەردى كەشەن قابىرعاسىندا كوپشىلىككە ۇسىنۋ ارقىلى ءوڭىرىمىزدىڭ ينۆەستيسيالىق تارتىمدىلىعىن دا ەسەلەي الامىز. قالامىز مۇنداي كورمە پاۆيلونىمەن ۇيالماي ماقتانا الاتىنىنا سەنىمدىمىن، – دەدى ا. باتالوۆ كورمە پاۆيلونىنىڭ اشىلۋ سالتاناتىندا.
وسى كۇنى شاراعا كەلگەندەردىڭ نازارىنا وتاندىق تاۋار وندىرۋشىلەر تاۋارلارىنىڭ كورمەسى ۇسىنىلدى. ولاردىڭ قاتارىندا «قاينار اكب» اككۋمۋلياتور زاۋىتى، «الماتى بوياۋلارى» ج ش س، «حاملە كومپاني لتد» ج ش س، «مەتاكون» ج ش س، ءسۇت جانە ءسۇت تاعامدارىن شىعاراتىن «ارقاباي» زاۋىتى، «JLC ءسۇت» زاۋىتى، كراحمال-سىرنە زاۋىتى جانە ت.ب. بار.
اتاپ وتسەك، عيماراتتىڭ ەكىنشى قاباتىندا كاسىپكەرلەر پالاتاسى ورنالاساتىن بولادى. كاسىپكەرلەر پالاتاسىنىڭ بيزنەس-ترەنەرى بيزنەس-مەكتەبىنىڭ جۇمىسىمەن تانىستىرىپ، شەبەرحانالار مەن زاماناۋي فوتولابوراتوريالار جانە باسقا دا قىزمەتتى تۋرالى بايانداپ بەردى.
جالپى كورمە كەشەنىنىڭ قۇرىلىسى 2016 جىلعى اقپاندا باستالعان. جالپى قۇنى – 1227،686 مىڭ تەڭگە. سىيىمدىلىعى – 260 ادام. عيماراتتىڭ جالپى الاڭى – 4437،8 م2.ءبىرىنشى قابات تۇگەلىمەن كورمە وتكىزۋگە ارنالادى. كورمە زالى كەشەنىنىڭ ەدەنى ەتنيكالىق ستيلدەگى پاننومەن بەزەندىرىلگەن.
https://dalanews.kz/32065
