Eńbek jáne halyqty áleýmettik qorǵaý ministrligi 2025 jyly 16 shildede "alty baladan kem balasy bar kópbalaly otbasylar memlekettik járdemaqydan qaǵylýy múmkin" degen aqparatty joqqa shyǵardy, dep habarlaidy Dalanews.kz.
Quzyrly vedomstvo málimetinshe, birqatar BAQ pen áleýmettik jeli paraqshalarynda "qoldanystaǵy zańnamaǵa sáikes alty jáne odan da kópbalaly otbasylar ǵana kópbalaly otbasy bolyp sanalady" degen jalǵan aqparattar taraǵan.
"QR Eńbek jáne halyqty áleýmettik qorǵaý ministrligi qoldanystaǵy zańnamaǵa sáikes 4 jáne odan da kóp kámeletke tolmaǵan balalary nemese birge turatyn 23 jasqa deiingi kúndizgi bólimde oqityn stýdentteri bar otbasyna kópbalaly otbasy mártebesi beriletinin habarlaidy", delingen ministrlik habarlamasynda.
Mundai otbasylarǵa tabysyna qaramastan ai saiynǵy járdemaqy tólenedi. Kópbalaly otbasylarǵa tólenetin tólemderdiń mólsheri balalardyń sanyna bailanysty saralanady jáne 2025 jyly:
- 4 balaǵa – 16,03 AEK nemese 63 030 teńge;
- 5 balaǵa – 20,04 AEK nemese 78 798 teńge;
- 6 balaǵa – 24,05 AEK nemese 94 565 teńge;
- 7 balaǵa – 28,06 AEK nemese 110 332 teńge;
- 8 jáne odan da kóp balaǵa – 4 AEK nemese ár balaǵa 15 728 teńge tólenedi.
Sonymen qatar, 6 jáne odan da kóp bala týyp, tárbielegen, "Kúmis alqa", "Altyn alqa" alqalary bar nemese buryn "Batyr ana" ataǵyn alǵan, I jáne II dárejeli "Ana dańqy" ordenderimen nagradtalǵan analarǵa mynadai mólsherde ai saiynǵy járdemaqy tólenedi:
- "Kúmis alqa" alqasymen marapattalǵan – 6,40 AEK nemese 25 165 teńge;
- "Altyn alqa" alqasymen marapattalǵan nemese buryn "Batyr ana" ataǵyn alǵan, I jáne II dárejeli "Ana dańqy" ordenderimen marapattalǵandar – 7,40 AEK nemese 29 097 teńge.
"Azamattardan tek resmi aqparat kózderinen alynǵan aqparatqa senýin suraimyz. Jalǵan aqparat taratý zań boiynsha jaýapkershilikke tartylatynyn eske salamyz",- deidi Eńbek ministrligi.
