Jeltoqsannyń 1-i Qazaqstan Respýblikasynyń Tuńǵysh Prezident kúninde semeilikter «AQShYŃ» turǵyn úi kesheniniń ashylý saltanatyna kýá boldy. Ústimizdegi jyldyń naýryz aiynda Tsementshiler kentinen boi kótergen 9 qabatty 128 páterli turǵyn úidi oblystaǵy alǵashqy biregei nysan dep aitýǵa ábden bolady. Óitkeni, aq kirpishten qalanǵan aqshańqan úidiń aldynda fýtbol alańy, turǵyndardyń kólikterin qoiatyn avtoparking, balalardyń oiyn alańy jáne otyryp dem alatyn alańqailar tolyǵymen qamtylǵan. Al turǵyn úidegi bir bólmeli páterdiń jalpy aýmaǵy 45 sharshy metr bolsa, eki bólmeli páter 70 sharshy metr jáne úsh bólmeli páterdiń jalpy aýmaǵy 98 sharshy metrdi quraidy.
Mundai aýqymdy istiń júzege asýyna uiytqy bolǵan ShQO máslihatynyń depýtaty, «AQShYŃ» korporatsiiasynyń prezidenti Marat Qurmanbaidyń aitýynsha, baspanalardyń barlyǵy da talapqa sai, páterge qonystanýshylarǵa jaily bolýy jan-jaqty eskerilgen. Qurylys barysynda eń birinshi kezekte baspananyń sapaly salynýyna basa mán berilgen.
Turǵyn úi kesheniniń ashylýyna orai arnaiy sóz alǵan Qazaqstan Kásipkerler palatasy tóraǵasynyń orynbasary, Qazaqstan Saýda kásiporyndary qaýymdastyǵynyń vitse-prezidenti Jibek Ájibaeva biznestiń áleýmettik jaýapkershiligin jete sezinip, únemi halyqqa qajetti sharýalardy atqaryp júretin áriptesi Marat Serikjanulynyń eńbegin biznesmen azamattar da joǵary baǵalaityndyǵyn atap ótti. Iaǵni, iskerlik qyrymen tanylyp júrgen kásipkerdiń halyqqa qolaily baspana salýdaǵy bastamasy óte quptarlyq, ózgelerge úlgi bolarlyq is.
– Marat Serikjanulymen elimizde biznes qanat jaia bastaǵan kezden birge jumys istep kelemiz, - dedi Jibek Tórehanqyzy.- Ol elimizde jabyq bazarlar salý bastamasyn alǵash bolyp qoldanysqa engizip, sonymen qatar bazarlardy zaman talabyna sai saýda ortalyqtaryna ainaldyrýda taǵy da birinshi bolyp ózin kórsete bildi. Onyń otandyq biznestiń ilgeri basýy jolynda úlgi etetin kóptegen isterin kórip júrmiz. Al búgin mine, óz qarajatyna turǵyn úi salyp, taǵy da bir úlken isimen tánti etip otyr. Sondyqtan da biz Marattai azamatty maqtan tutamyz.
Rasynda da birinshi kezekte táýkeldilik qasietin tanytatyn osyndai turǵyn úi keshenin salýǵa batyl kirisken biznesmen ilý de bireý. «Jaqsynyń jaqsylyǵyn ait nury tasysyn» degendei, jinalǵan qaýym tap osy sátte taǵy bir qýanyshtyń kýási boldy.
Kóp jyldar boiy jataqhananyń tar bólmesinde turyp kelgen alty balasy bar ana Meiramgúl Ábdýálievaǵa Marat Qurmanbai óz qolymen 2 bólmeli páter kiltin syiǵa tartty. Sóz joq, baspana jaiy talai jyldan bergi basty máselesine ainalǵan ana úshin dál osy táýlik «aq túieniń qarny jarylǵan kún» boldy. Páter alý jaiymen oblys ákimi Danial Ahmetovtyń qabyldaýynda bolǵan ol ótinishiniń oryndalǵanyna sheksiz qýanyshty.
– Men osy Tuńǵysh Prezident kúninde elimizde tynyshtyqty saqtap kele jatqan Elbasymyz Nursultan Nazarbaevqa, páter máselesimen barǵanymda qabyldaǵan oblys ákimi Danial Ahmetovke, Semei qalasy ákimdigine jáne óziniń bastamasymen salynǵan «AQShYŃ» turǵyn úi kesheninen páter kiltin syilaǵan Marat Serikjanulyna sheksiz alǵysymdy bildirgim keledi. Oblystyq máslihat depýtaty Marat Qurmanbaidyń buǵan deiin de maǵan jasaǵan jaqsylyq, kómekteri kóp. Al búgin mine baspana alyp turmyn. Tek qana osyndai jaqsylyqtarǵa jete bereiik, - dedi rizalyǵy sheksiz kóp balaly ana.
Semei qalasy ákiminiń orynbasary Qairat Erembesov qala turǵyndaryn qalalyq ákimdik atynan merekemen quttyqtai kelip, «AQShYŃ» turǵyn úi kesheniniń az ýaqyt ishinde paidalanýǵa berilýi qala ómirindegi eleýli oqiǵa ekendigin atap ótti.
Ashylý saltanatynda sóz alyp, Elbasy Joldaýynda aitylǵan jailardy árdaiym nazarda ustanatyndyǵyn bildirgen «AQShYŃ» korporatsiiasynyń prezidenti Marat Qurmanbai ózge de birneshe otbasylarǵa páter kiltin tabys etti. Sonymen qatar osynaý irgeli qurylysty mejeli ýaqytynda aiaqtap, halyq igiligine berý jolynda jumyla eńbek etken qurylys kompaniialaryna alǵysyn bildirdi.
Semeide taǵy bir igilikti istiń tusaýy kesildi.
Sátjan QASYMJANULY,
Shyǵys Qazaqstan oblysy
