Astanada polıseıler iri kólemde qarjy urlady degen kúdikke ilingen kompanıanyń burynǵy satý bóliminiń menejerin ustady, dep habarlaıdy Dalanews.kz. 

Quqyq qorǵaý organdarynyń málimetinshe, kúdikti jumys istep júrgen kezinde kompanıanyń korporatıvtik bank shotyna qol jetkizý múmkindigine ıe bolǵan. Alaıda ol jumystan ketkennen keıin, onyń jeke eseptik jazbasy der kezinde buǵattalmaǵan, al bul olqylyqty burynǵy qyzmetker jeke maqsatta paıdalanyp ketken.

"Tergeý barysynda anyqtalǵandaı, kúdikti birneshe aı boıy kompanıa qarajatyn óz shottaryna aýdaryp otyrǵan. Nátıjesinde keltirilgen jalpy zalal kólemi 14 mıllıon teńgeni qurady. Aqsha tek jeke qajettilikterine jumsalǵan", – delingen resmı habarlamada.

Qazirgi tańda kúdikti ýaqytsha ustaý ızolátoryna qamaldy. Oǵan qatysty qylmystyq is qozǵalyp, sotqa deıingi tergeý amaldary júrgizilýde.