Qaraǵandy oblysynyń turǵyndaryna kommýnaldyq qyzmetter úshin tólengen 3,1 milliard teńgeden astam qarajat qaitarylady. Bul qarjy tabiǵi monopoliialar sýbektileriniń qyzmetin tekserý nátijesinde anyqtalǵan artyq tólemderge bailanysty kompensatsiialyq tarifter arqyly ótelmek, dep habarlaidy Dalanews.kz.
Qaraǵandy oblysy boiynsha Tabiǵi monopoliialardy retteý komitetiniń málimetinshe, 2024 jylǵa arnalǵan eseptilikti taldaý barysynda kommýnaldyq kásiporyndar tarifke engizilgen qarajattyń bir bóligin maqsatty túrde paidalanbaǵany belgili bolǵan.
Zańnamaǵa sáikes, mundai jaǵdaida tutynýshylardyń artyq tólegen qarajatyn qaitarý úshin kompensatsiialyq tarif engiziledi. Qaitarylatyn qarajatqa qaita qarjylandyrý mólsherlemesi de qosylyp, jalpy soma 3,1 mlrd teńgeden asady.
Qaitarylatyn qarajattyń negizgi bóligi sýmen jabdyqtaý jáne sý burý qyzmetterine tiesili - shamamen 2,27 mlrd teńge.
Sonymen qatar:
- 669,6 mln teńge – elektr energiiasyn jetkizý qyzmeti boiynsha;
- 107,7 mln teńge – jylýmen qamtý salasy boiynsha;
- 55,6 mln teńge – gazben jabdyqtaý qyzmeti boiynsha;
- 3,7 mln teńge shamasynda – kirme temirjol joldaryn paidalaný qyzmetteri úshin qaitarylady.
Kompensatsiialyq tarifter 2026 jyldyń 1 qańtarynan 2027 jyldyń 1 naýryzyna deiin qoldanysta bolady. Osy kezeń ishinde qaraǵandylyqtardyń kommýnaldyq tólemderi tómendetilip, artyq tólengen qarajat birtindep qaitarylady.
