Atyraý qalasy Aqjar aýylynda 13 jastaǵy jalǵyz ulynan aiyrylǵan Anargúl Qasantaeva tergeý ádiletsiz ekenin aityp, Jaiyq jaǵasynda óz-ózine qol jumsamaq boldy, - dep habarlaidy Dalanews.kz Stan.kz-ǵa siltep.
Basylym málimetinshe, Aqjar aýylynda 21 tamyzda 7-synyp oqýshysy Merlan belgisiz jaǵdaida sýǵa batyp qaza tapqan. Marqumnyń anasynyń aitýynsha, ulynyń sýǵa óz erkimen túsip, batyp ketýi múmkin emes. Sebebi Merlandy sol kúni kórgenderdiń bári anasyna “10-synyptaǵy oqýshy ony sýǵa iterip jiberdi, ulyńyzdy izdemei-aq qoiyńyz” dep aitqan.
Anargúl Qasantaeva jalǵyz ulynan aiyrylǵaly beri politsiia men prokýratýranyń tabaldyryǵyn tozdyrǵanyn alǵa tartty. Onyń sózinshe, tergeý áli kúnge deiin sozylyp, eshqandai nátije bolyp jatqan joq. Qulazyǵan ana tipti ómirden baz keshkenin jasyrmady.
“Mine ulymnyń qazasynan beri qansha ýaqyt ótti. Tergeýshiler taǵy bir apta kútińiz dedi, kúttim. Ekinshi aptaǵa ketti. Alaida ulymdy sýǵa túsýge itermelegender áli bostandyqta. Eshqandai shara qabyldanyp jatqan joq. Tergeý júrgizilip jatyr deidi. Biraq osymen tergeýshilerdiń birnesheýi aýysty. Áli bir durys jaýap estimedim. Ádildik pen kómek surap barmaǵan jerim joq. Tipti prokýratýraǵa barǵanymda kúzetshiler meni julqylap qýyp shyqty. Basqa amalym da qalmady”, – dedi qaiǵy jutqan ana.
Marqumnyń anasy istiń 104-baptan aýystyrylýyn talap etken.
“Jalǵyz ulym edi. Kúdiktiler bostandyqta. Al tergeý áli 104-baptan aýystyrylmady. Surasam aýystyramyz, tergep jatyrmyz deidi. Biraq qansha ýaqyt ótti áli eshqandai nátije joq. Barmaǵan jerim joq. Bárinen kómek suradym. Áleýmettik jelide de osy máselemdi jazyp kóterdim. Biraq esh kómek bolyp jatqan joq.
Mine dál, qazir ulym sýǵa ketken Jaiyqtyń jaǵasynda otyrmyn. Ózim de osy sýǵa ketsem, bálkim is sonda ǵana ádil tergeler. Qazaqstanda ádildik qaida? Adamdarǵa ne bolǵan? Bárinen sharshadym! Eger men de ulymnyń artynan sýǵa ketsem, osy oqiǵany jazyp shyǵararsyzdar”, – dedi Anargúl.
Atyraý qalasynyń politsiia departamenti bul jaǵdaiǵa qatysty pikir bildirdi.
“Oqiǵaǵa bailanysty Jaiyq jaǵasy tekserildi. Ýchastkelik politsiia úiine baryp tekserip, úiinde ekenin anyqtady. Bul jaǵdaiǵa qatysty is tergelip jatyr. Tergeý ol bir kúnde bitetin is emes. Jábirlenýshi tarapty túsinemiz. Sol úshin de túsindirý jumystary júrgizildi. Jan-jaqty keshendi tergeý amaldary júrgizilýde. Bul kisi generaldyń da qabyldaýynda boldy. Quqyqtyq keńes berildi. Jergilikti politsiia basshylyǵy baqylaýǵa alyp, turǵynnyń jaǵdaiyn tekserip turady”, – dedi Politsiia departamenti ókili.
Atyraý qalalyq prokýratýrasy da jaǵdaiǵa túsinik berdi. Olardyń sózinshe, Anargúl Qasantaevany eshqandai kedergisiz qabyldaǵan.
“Kelgen kisini biz qýyp jibermeimiz. Zań boiynsha túsindirip aittyq. Túsingisi kelmeidi endi. Qaiǵyda otyrǵan adamdy túsinemiz. Tergeý tekserý jumystary júrgizilip jatyr. Tergeýdiń qupiialyǵyna bailanysty aqparatty jariia ete almaimyz. Sot meditsinalyq saraptamanyń qorytyndysyn kútip otyrmyz. Sodan keiin baryp sheshim qabyldaimyz. Saraptama osy apta shyǵady dep kútýdemiz. Al bapty aýystyrý boiynsha másele saraptama qorytyndysynan soń belgili bolady. Kúnine úsh ret kelse, úsh ret qabyldap otyrmyz bul kisini. Bizge kelgende ol kisi túsingendei bolyp, shyǵyp ketken edi”, – dedi Atyraý qalasynyń prokýratýra ókilderi.
