Kolýmbiianyń Tynyq muhity jaǵalaýynda bolǵan kúshti jer silkinisinen qaza tapqandar sany 132 adamǵa jetti. Taǵy 87 adam túrli jaraqat alǵan. AQSh Geologiialyq qyzmetiniń málimetinshe, jer silkinisiniń magnitýdasy 7,4 ball bolǵan, dep habarlaidy dalanews.kz.
Jer silkinisi dúisenbi kúni jergilikti ýaqytpen saǵat 07:34-te tirkelgen. Jerasty dúmpýiniń epitsentri San-Hose-del-Palmar aýyly mańynda ornalassa, oshaǵy 107 shaqyrym tereńdikte jatqan, dep jazady BBC.
Apatqa bailanysty Kolýmbiiada tótenshe jaǵdai rejimi jariialandy.
Jýyrda ótken sailaýdan keiin el basshylyǵyna kelgen prezident de la Esprielia úkimettiń barlyq resýrsy zardap shekken óńirlerge jumyldyrylǵanyn málimdedi.
– Ulttyq úkimet azamattardy qorǵaý, zardap shekken aimaqtardy qoldaý jáne qajetti kómekti jetkizý úshin barlyq múmkindigin paidalanyp jatyr. Qazir basty mindet – úiindi astynda qalǵan adamdardy qutqarý, – dedi prezident.
Kolýmbiiadaǵy halyq sany boiynsha úshinshi iri qala sanalatyn Kalidiń meri Alehandro Eder bastapqyda 18 adamnyń qaza tapqanyn habarlaǵan. Onyń aitýynsha, qalada keminde 20 ǵimarat qulaǵan. Keiinirek qurbandar sanynyń artqany belgili boldy.
Choko departamentiniń basshysy Nýbiia Karolina Kordoba kóptegen adamnyń zardap shekkenin aitty, alaida naqty sanyn jariialamady. Onyń sózinshe, departamenttiń ákimshilik ortalyǵy Kibdo qalasynda kóptegen ǵimarat qatty zaqymdanyp, jaralanǵandar bar.
Kórshiles Risaralda provintsiiasynyń gýbernatory Hýan Diego Patino jergilikti Blu Radio radiosyna bergen suhbatynda departament astanasy Pereira qalasyndaǵy birqatar ǵimaratqa aitarlyqtai zaqym kelgenin málimdedi.
– Bul óte aýyr jaǵdai. Kórinister shynymen de qorqynyshty: adamdar jaralanǵan, ǵimarattardyń qasbetteri opyrylyp túsken, – dedi ol.
Jer silkinisiniń dúmpýi epitsentrden shamamen 400 shaqyrym qashyqtyqtaǵy el astanasy Bogotada da sezilgen. Qalada baǵdarshamdar men aǵashtar terbelip, turǵyndar úilerinen syrtqa júgirip shyqqan. Birneshe ǵimarattan adamdar evakýatsiialanǵan.
Keiin Bogota meri Karlos Galan áleýmettik jelide jariialaǵan málimetinde astanada eleýli zaqym tirkelmegenin habarlady.
