Kólikti 5 minýttan artyq qyzdyrǵany úshin aiyppul salý zańda joq bolyp shyqty, dep habarlaidy Dalanews.kz Ulysmediaǵa siltep.
Kólikti bes minýttan artyq qyzdyrýǵa zańda tyiym salynbaǵan. Bul týraly Májilis depýtaty, zańnama jáne sot-quqyqtyq reforma komitetiniń múshesi Baqytjan Bazarbek málimdedi. Ol komitet tiisti túzetýler engizgenin, oǵan sáikes osyndai normalardy jergilikti ókildi organdar – máslihattar bekite alatynyn atap ótti.
- Sizder (memlekettik organdar) zańda “bes minýt” degen túsiniktiń joq ekenin túsindirýlerińiz kerek edi. Osylai shýlatyp jibergen ózderińiz, qazir búkil halyq bes minýt týraly aityp júr. Muny ishki ister ministrligi men basqa da memlekettik organdar birigip túsindirýi tiis edi. Al qazir, túsindirý jumystarynyń júrgizilmeýiniń saldaryn kórip otyrmyz. Kóptegen adam osy máseleni haipqa ainaldyryp jiberdi, – dedi depýtat.
Óz kezeginde ishki ister ministriniń orynbasary Igor Lepeha bes minýt týraly norma jol qozǵalysy týraly zańda «toqtap turý» men «turaq» uǵymdaryn ajyratý úshin qoldanylǵanyn aitady.
Qozǵaltqyshty qyzdyrý týraly zańda bes minýt degen talap joq. Eger turǵyndarǵa qolaisyzdyq týdyryp, kedergi jasaityn bolsa tek mehanikalyq kólikterdiń qozǵaltqyshy qosýly kúide eldi mekenderdiń arasynda toqtap turýyna tyiym salynady. Bul norma boiynsha tek shaǵym túsken jaǵdaida ǵana jaýapkershilikke tartylady. Ótken jyly osyndai úsh jaǵdai boldy, onyń bireýin prokýratýra toqtatty. Iaǵni, qozǵaltqyshty qyzdyrǵany úshin eshkimge aiyppul salynǵan joq. Bul – qoldan jasalǵan problema», – dep sendirdi vitse-ministr.
Buǵan deiin Májilis depýtaty Serik Erýbaev óńirlerdiń temperatýralyq rejimi men klimatyn eskere otyryp, qosýly kólikke qatysty normany qaita qaraýdy suraǵan bolatyn.
Al QR IIM bul jańashyldyq emes ekenin, atalǵan normanyń qoldanysqa engizilgennen beri 20 jyldan astam ýaqyt ótkenin atap ótti.
QR IIM Ákimshilik politsiia komiteti bul rette QR ÁQBtK-niń 597-babynan buzǵany úshin azamattarǵa 5 AEK (19 660 teńge) mólsherinde, al qaitalap buzǵany úshin – 10 AEK (39 320 teńge) mólsherinde aiyppul qarastyrylatynyn eske saldy.
