Kólikpen tý ustap júrgenderdi toqtatqan politseiler qyzmetten qýyldy, dep habarlaidy Dalanews.kz.
Táýelsizdik kúnine orai ótken merekelik sharalar kezinde áleýmettik jeli qoldanýshylary kólikterin memlekettik týmen bezendirgen júrgizýshilerdi jol-patrýldik politsiia qyzmetkerleri toqtatqanyn jazǵan edi.
Osy jaitqa bailanysty Ishki ister ministrligi túsinikteme berip, memlekettik týdy kólikke ilý zań buzýshylyq bolyp sanalmaitynyn atap ótti. Alaida ministrlik málimetinshe, keibir azamattar merekelik kúnderi jol qozǵalysy erejelerin buzyp, ózge qatysýshylarǵa kedergi keltirgen jáne kóshelerdi jaýyp tastaǵan.
Sonymen qatar IIM kólikterdi zańsyz toqtatý faktileri boiynsha tekseris júrgizilgenin habarlady. Nátijesinde, respýblika boiynsha politsiia qyzmetkerleri jol qozǵalysy erejeleriniń 82 óreskel buzýshylyǵyn anyqtap, jolyn kesken.
Ministrliktiń málimdeýinshe, tekserý barysynda Almaty men Shymkent qalalarynda birqatar jaǵdaida politsiia qyzmetkerleri tarapynan zańsyz, quqyqqa qaishy áreketterge jol berilgeni belgili bolǵan.
Atalǵan derekter boiynsha segiz politsiia qyzmetkeri tártiptik jaýapkershilikke tartyldy. Olarǵa eskertý jáne qatań sógis jariialanǵan, onyń ishinde basshylyq quram ókilderi de bar. Taǵy tórt qyzmetker atqaryp otyrǵan laýazymynan bosatyldy.
IIM azamattardy memlekettik rámizderge qurmetpen qaraýǵa jáne jol qozǵalysy erejelerin qatań saqtaýǵa shaqyrdy.
