Kólik vitse-ministri Sátjan Ablaliev sybailas jemqorlyq boiynsha ustaldy degen aqparat tarady. Sheneýnik jol qurylysyn baqylaýshy kompaniiadan 78 myń AQSh dollary kóleminde para aldy degen kúdikke ilindi. Derekkózder málimetinshe, bul qarajat Ulybritaniiada oqityn balasynyń oqý aqysyn tóleýge jumsalǵan degen boljam bar, dep habarlaidy Dalanews.kz.
Tergeý derekterine qaraǵanda, Ablaliev respýblikalyq mańyzy bar joldar qurylysyn tehnikalyq qadaǵalaý salasyndaǵy jekelegen kompaniialarǵa zańsyz túrde qoldaý kórsetken. Osy qyzmeti úshin ol iri kólemde para alǵan bolýy múmkin.
Sátjan Ablaliev kólik vitse-ministri qyzmetin 2023 jyldan beri atqaryp kelgen. Buǵan deiin ol uzaq jyl boiy Kólik ministrligine qarasty Avtomobil joldary komiteti tóraǵasynyń orynbasary bolǵan.
2021-2023 jyldar aralyǵynda Ablaliev Soltústik Qazaqstan oblysy ákiminiń orynbasary qyzmetin de atqarǵan.
Qazir bul is boiynsha tergeý amaldary júrip jatyr. Kólik ministrligi bul jaǵdaiǵa qatysty resmi málimdeme jasaǵan joq. Buǵan deiin ministrlik jolaýshylardyń bagaj salmaǵyn biriktirý máselesin qarastyryp, jańa usynystar engizgen bolatyn.
