Biyl Qazaqstanda qys qarsyz ótip jatyr. Aýyl sharýashylyǵy ministrliginiń dereginshe, qýańshylyq jyldary dándi daqyldardyń ónimdiligi 15–30%-ǵa tómendeidi, al soltústiktiń keibir óńirlerinde bul kórsetkish 40%-ǵa deiin jetýi múmkin, dep habarlaidy Dalanews.kz.
Mundai jaǵdaida fermerlerge qandai kómek qajet? Bul suraqqa Qazaq Expert Club sarapshysy, Qazaqstan Jastar parlamentiniń sý máseleleri jónindegi prezidenti Qýanysh Ózbekov jaýap berdi.
Orta eseppen qar jamylǵysy kóktem basynda topyraqtaǵy ylǵal qorynyń 30–40%-yn qamtamasyz etedi. Sondyqtan fermerler ylǵaldy únemdeitin tehnologiialardy qoldanýy qajet. Tájiribe kórsetkendei, mundai tásilder qýań maýsymda ónimdilikti 10–20%-ǵa arttyryp, janar-jaǵarmai shyǵynyn 2–3 ese qysqartady.
Sonymen qatar shyǵynnan qorǵanýdyń bir joly – qýańshylyqqa qarsy indekstik saqtandyrý. Ol úshin belgili bir aimaqtaǵy salystyrmaly ylǵaldylyq nemese NDVI indeksi paidalanylady. Eger ylǵaldylyq belgilengen deńgeiden tómen tússe, ótemaqy avtomatty túrde tólenedi. Bul klassikalyq saqtandyrýǵa qaraǵanda yńǵaily, óitkeni akt, foto jinap, zalaldy dáleldeýdiń qajeti joq.
Agrosaqtandyrý korporatsiiasynyń málimetinshe, 2023–2024 jyldary indekstik saqtandyrý boiynsha bir gektarǵa ortasha ótemaqy 15–25 myń teńge bolǵan. Al keibir qýań aýdandarda bul soma gektaryna 35 myń teńgege deiin jetken.
