Kókshetaýda jalǵyzbasty anany qaǵyp óltirgen áieldiń júrgizýshi kýáligi bolmaǵany anyqtaldy, dep habarlaidy dalanews.kz.
Politsiianyń málimetinshe, ol eshqashan kólik júrgizýdi oqymaǵan jáne avtokólik basqarýǵa múlde quqyǵy bolmaǵan.
Adam ólimine ákelgen jol apatynan keiin áielge qatysty jol qozǵalysy erejelerin buzý faktisi boiynsha qylmystyq is qozǵaldy. Tergeý málimetine sáikes, bul is adam ólimine ákelgen jol-kólik oqiǵasyna bailanysty ashylǵan.
Sonymen qatar kúdiktiniń kúieýine de is tirkeldi. Tergeý nusqasy boiynsha, jol talǵamaityn kóliktiń iesi júrgizýshi kýáligi joq adamǵa rólge otyrýǵa ruqsat bergen.
Sot sheshimimen áiel úiqamaqqa alyndy.
Eske salaiyq, Kókshetaýda turǵyn úi aýmaǵyndaǵy avtoturaqqa kirip kele jatqan kólik áieldi qaǵyp ketip, oqiǵa saldarynan ol kóz jumdy. Qaiǵyly jaǵdaidyń videosy áleýmettik jelide tarady.
Marqumnyń týystarynyń aitýynsha, otbasy sol kúni qyz uzatý toiyna bailanysty Kókshetaý qalasyna jinalǵan. Áýlet úlken qýanyshtyń qamymen júrgen.
Qaza tapqan áieldiń artynda 12 jastaǵy balasy qalǵan.
