Qazaqstannyń Kókpar federasıasy Qyrǵyzstannyń revansh ótkizý týraly usynysyna jaýap berdi, - dep habarlaıdy Dalanews.kz Azattyqqa silteme jasap.
Federasıadaǵylar kókparshylar qyrǵyzstandyqtar shaqyrǵan kúnge "basqa mańyzdy sharýalar josparlanǵanyn" aıtady.
"Qazirgi tańda kókparshylarymyz basqa oıyndarǵa daıyndalyp jatyr", - deıdi Qazaqstannyń Kókpar federasıasy ókilderi.
Buǵan deıin qyrǵyzdar qazaqtardy taǵy bir sheshýshi oıynǵa shaqyrǵan bolatyn.
Qyrǵyzstan tarapy 1 qarashada Ystyq-Kólde Kelisim kýbogyn ótkizýge shaqyrdy. Qazaqstan tarapyna shaqyrtý haty búgin jiberilgen.
"1 qarashada kókbóri jáne kókpardy sol qurammen oınaýǵa shaqyramyz. Bul - sport, oıyn eki halyq arasyndaǵy alaýyzdyqty týdyrmaýy kerek. Biz halyqtarymyzdyń kelisimi úshin óz ambısıalarymyzdan bas tartýǵa daıynbyz. Sýdıa basqa elden bolady", - deıdi kókbóri federasıasynyń basshysy Ramıs Djýnýsalıev.
Eske salaıyq, 12 qyrkúıekte Dúnıejúzilik kóshpendiler oıyndarynda týrnırdiń fınalynda Qyrǵyzstan men Qazaqstan quramalarynyń kókparshylary jappaı tóbelese jazdaǵan bolatyn.
"Ulysmedıa" málimetinshe, birinshi taımnyń sońyna 6 mınýt qalǵanda 1:3 esebimen Qyrǵyzstan quramasy alǵa shyqqan. Osydan keıin janjal bastalyp ketti. Sportshylar birin-biri qamshymen urdy. Keıin polısıa kelip, olardy ajyratty. Fınal ýaqytsha toqtatyldy. Qos tarap sabyrǵa kelip, keıinnen oıyn jalǵasty.
Massaget.kz málimetinshe, oıyn nátıjesi boıynsha, Qazaqstan ulttyq quramasy top jardy. Otandastarymyz fınalda qyrǵyz shabandozdaryn utty.
Ekinshi kezeńde Qazaqstan quramasy esepti teńestirip qana qoımaı, 4:3 esebimen alǵa ozǵan. Alaıda qyrǵyzdar oıyn aıaqtalar tusta salym salyp, nátıjeni teńestirip ketti.
Qosymsha ýaqyttaǵy saıysta 5:4 esebimen Qazaqstan quramasy jeńiske jetti.
"Kóshpendiler oıyndarynyń oqý-jattyǵý jıynyn jyl basynda bastadyq. Eldi qýantamyz degen maqsatymyz bolǵan edi. Qyrǵyz aǵaıyndarmen kezdesý qıyn bolady degen edim. Rasynda solaı boldy. Dese de el namysyn qoldan bermeı, úmitti aqtadyq", – dedi kókpardan ulttyq quramanyń bas bapkeri Aqylbaı Mankeev.
Qyrǵyzstandyq sportshylar marapat aıaqtalǵanyn kútpeı trıbýnadan ketip qaldy.
