«Kók-tóbe Opera – 2018» ashyq aspan astyndaǵy mýzyka festivali
Festivaldi uiymdastyrýshy Almaty qalasy ákimdigi Mádeniet basqarmasynyń habarlaýynsha, opera janrynyń talǵampaz tyńdarmany bul joly keshtiń basty qonaǵy Vinchentso Kostantsanyń ónerin tamashalai alady. Sondai-aq, klassikalyq án merekesinde simfoniialyq orkestrdiń súiemeldeýimen Abai atyndaǵy Qazaq memlekettik akademiialyq opera jáne balet teatrynyń tanymal solisteri men opera juldyzdary álemniń eń úzdik kompozitorlarynyń týyndylaryn oryndaidy.
«Biylǵy festival qala kúnine tartý retinde arnaiy uiymdastyrylyp otyr. Dirijer – Qazaqstannyń eńbek sińirgen qairatkeri Alan Bóribaev», deidi uiymdastyrýshy Almaty qalasy ákimdigi Mádeniet basqarmasy.
Eske sala keteiik, «Kók-tóbe Opera» festivali alǵash Almatyda 2016 jyly ásem qalanyń 1000 jyldyǵyna orai shymyldyǵyn ashqan bolatyn. Sodan beri jyl saiyn ótkizilip kele jatqan festival óner shyńy – opera tyńdarmanynyń súiikti merekesine ainaldy.
Naqtyraq aitqanda, almatylyqtar men qala qonaqtary Lissabondaǵy «San-Karlýsh», Modendegi Lýchano Pavarotti, Neapoldaǵy «San Karlo» teatrlarynyń solisi Alehandro Roi,Vinchentso Kostantsasyndy sańlaqtardyń ónerine tánti bolǵan. Sonymen qatar, festivalda QR Memlekettik syilyǵynyń laýreaty Talǵat Kúzenbaev, Qazaqstannyń eńbek sińirgen qairatkeri Jámilá Baspaqova, Gúlzat Dáýirbaeva, Oksana Davydenko, Dana Talasbekova, Qairat Ómirbekov, Venera Alpysbaeva, Aleksandr Smetanin, Emil Sakavov jáne Elena Nikonova syndy halyqaralyq konkýrstardyń laýreattary óner kórsetip keledi.
Biylǵy keshte de Abai atyndaǵy Qazaq memlekettik akademiialyq opera jáne balet teatrynyń áigili solisteri negizgi kompozitsiialardy oryndaiy.
Dirijer Alan Bóribaev klassikalyq mýzyka merekesine qatysty BAQ-qa bergen suhbatynda Kóktóbede ótkizilip kele jatqan festival kórermenge dúniejúzilik deńgeidegi óner ordalarynyń shyǵarmashylyǵyn jaqyn tanystyrady degen bolatyn.
«Men birqatar memlekette tabiǵat aiasynda ótkizilgen kontsertterde dirijerlik ettim. Tynyq muhitynyń jaǵalaýynda Avstraliiada ótken sondai bir keremet kontsert áli esimde. Kóktóbedegi festival tyńdarmanǵa dúniejúzilik deńgeidegi óner ordasynyń shyǵarmashylyǵyn jaqyn tanystyrady», – dedi Alan Bóribaev.
