فەستيۆالدى ۇيىمداستىرۋشى الماتى قالاسى اكىمدىگى مادەنيەت باسقارماسىنىڭ حابارلاۋىنشا، وپەرا جانرىنىڭ تالعامپاز تىڭدارمانى بۇل جولى كەشتىڭ باستى قوناعى ۆينچەنسو كوستانسانىڭ ونەرىن تاماشالاي الادى. سونداي-اق، كلاسسيكالىق ءان مەرەكەسىندە سيمفونيالىق وركەستردىڭ سۇيەمەلدەۋىمەن اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ تانىمال سوليستەرى مەن وپەرا جۇلدىزدارى الەمنىڭ ەڭ ۇزدىك كومپوزيتورلارىنىڭ تۋىندىلارىن ورىندايدى.
«بيىلعى فەستيۆال قالا كۇنىنە تارتۋ رەتىندە ارنايى ۇيىمداستىرىلىپ وتىر. ديريجەر – قازاقستاننىڭ ەڭبەك سىڭىرگەن قايراتكەرى الان بورىبايەۆ»، دەيدى ۇيىمداستىرۋشى الماتى قالاسى اكىمدىگى مادەنيەت باسقارماسى.
ەسكە سالا كەتەيىك، «كوك-توبە Opera» فەستيۆالى العاش الماتىدا 2016 جىلى اسەم قالانىڭ 1000 جىلدىعىنا وراي شىمىلدىعىن اشقان بولاتىن. سودان بەرى جىل سايىن وتكىزىلىپ كەلە جاتقان فەستيۆال ونەر شىڭى – وپەرا تىڭدارمانىنىڭ سۇيىكتى مەرەكەسىنە اينالدى.
ناقتىراق ايتقاندا، الماتىلىقتار مەن قالا قوناقتارى ليسسابونداعى «سان-كارلۋش»، مودەندەگى لۋچانو پاۆاروتتي، نەاپولداعى «سان كارلو» تەاترلارىنىڭ ءسوليسى الەحاندرو روي،ۆينچەنسو كوستانساسىندى ساڭلاقتاردىڭ ونەرىنە ءتانتى بولعان. سونىمەن قاتار، فەستيۆالدا ق ر مەملەكەتتىك سىيلىعىنىڭ لاۋرەاتى تالعات كۇزەنبايەۆ، قازاقستاننىڭ ەڭبەك سىڭىرگەن قايراتكەرى ءجاميلا باسپاقوۆا، گۇلزات داۋىربايەۆا، وكسانا داۆىدەنكو، دانا تالاسبەكوۆا، قايرات ومىربەكوۆ، ۆەنەرا الپىسبايەۆا، الەكساندر سمەتانين، ەميل ساكاۆوۆ جانە ەلەنا نيكونوۆا سىندى حالىقارالىق كونكۋرستاردىڭ لاۋرەاتتارى ونەر كورسەتىپ كەلەدى.
بيىلعى كەشتە دە اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ايگىلى سوليستەرى نەگىزگى كومپوزيسيالاردى ورىندايى.
ديريجەر الان بورىبايەۆ كلاسسيكالىق مۋزىكا مەرەكەسىنە قاتىستى باق-قا بەرگەن سۇحباتىندا كوكتوبەدە وتكىزىلىپ كەلە جاتقان فەستيۆال كورەرمەنگە دۇنيەجۇزىلىك دەڭگەيدەگى ونەر وردالارىنىڭ شىعارماشىلىعىن جاقىن تانىستىرادى دەگەن بولاتىن.
«مەن ءبىرقاتار مەملەكەتتە تابيعات اياسىندا وتكىزىلگەن كونسەرتتەردە ديريجەرلىك ەتتىم. تىنىق مۇحيتىنىڭ جاعالاۋىندا اۆستراليادا وتكەن سونداي ءبىر كەرەمەت كونسەرت ءالى ەسىمدە. كوكتوبەدەگى فەستيۆال تىڭدارمانعا دۇنيەجۇزىلىك دەڭگەيدەگى ونەر ورداسىنىڭ شىعارماشىلىعىن جاقىن تانىستىرادى»، – دەدى الان بورىبايەۆ.
