Mons ýniversitetinde (UMONS) jastar arasynda kitap oqýdy dáripteýge, bilimge, mádenietke jáne ulttyq muraǵa degen qyzyǵýshylyqty arttyrýǵa baǵyttalǵan qazaqstandyq «Kitap oqityn ult» jobasynyń tanystyrylymy ótti, dep habarlaidy dalanews.kz.
Kezdesýge Ekonomika jáne menedjment fakýltetiniń dekany, qazan aiynan bastap turaqty damý jáne qoǵamdyq ómir máseleleri jónindegi prorektor qyzmetine kirisetin Shantal Skýbo (Chantal Scoubeau), ýniversitet oqytýshylary, sondai-aq bakalavriat, magistratýra jáne doktorantýranyń 40-tan astam stýdenti qatysty. Qatysýshylarǵa respýblikalyq kitap oqý marafonynyń negizgi maqsattary jáne bastamaǵa konkýrstan tys formatta qosylýǵa múmkindik beretin onyń jańa Parasat baǵyty tanystyryldy.
Buǵan deiin Qazaqstanda bolǵan Mons ýniversitetiniń stýdenti Jad Sharpante (Jade Charpentier): «Jastar arasynda kitap oqýdy nasihattaýǵa baǵyttalǵan bul bastama oi-óristi keńeitýge, jańa ideialar men mádenietterdi tanyp-bilýge, sondai-aq qorshaǵan álemge jańasha kózqaraspen qaraýǵa múmkindik beredi», – dep atap ótti.
Tanystyrylym zamanaýi Qazaqstanǵa, onyń ulttyq dástúrleri men tiline arnalǵan baǵdarlamamen jalǵasty. Mons qalasynda turatyn otandastarymyz Aigerim Aqqulova (Qazaq Centre) men Ainur Kasenova qazaqtyń salt-dástúrleri jáne olardyń qoǵam ómirindegi orny týraly áńgimeledi. Aýyzsha jáne jazbasha aýdarma fakýltetiniń postkeńestik keńistikti zertteý kafedrasynyń stýdentteri qazaq tiline erekshe qyzyǵýshylyq tanytty. Interaktivti sabaq barysynda olar kúndelikti qoldanystaǵy sózder men sóz tirkesterin úirenip, qazaq tilinde alǵashqy sóilemderin aitty. Sondai-aq stýdentter qazaq tilin odan ári úirenýge jáne fakýltette tolyqqandy qazaq tili kýrsynyń ashylýyna qyzyǵýshylyq bildirdi.
Dombyrada eki qazaq kúiin oryndaǵan belgiialyq stýdentter Anjelika men Ksaveniń óneri erekshe qyzyǵýshylyq týdyrdy. Buǵan deiin olar Almatyda alty ailyq taǵylymdamadan ótip, Qazaqstannyń mádenietimen jáne kúndelikti ómirimen tanysyp, qazaqtyń ulttyq aspabyn meńgere bastaǵan.
Mons ýniversitetinde ótken jobanyń tanystyrylymy onyń halyqaralyq aýditoriiasyn keńeitip, belgiialyq stýdentterge Qazaqstandy ádebiet, til jáne mýzyka arqyly tanyp-bilýdiń taǵy bir múmkindigin usyndy.
