Kezdesýdi aýdan ákiminiń orynbasary Aıbek Bıdaev ashyp, Elbasynyń «Bolashaqqa baǵdar: rýxanı jańǵyrý» baǵdarlamalyq maqalasy aıasynda aýdanda atqarylyp jatqan jumystardy baıan etip, baǵdarlamalyq maqaladaǵy qazaq tilin latyn álipbıine kóshirýge qatysty oıyn da aıtty.
Halyqpen basqosýda sóz alǵan toptyń beldi músheleri İ.Jansúgirov atyndaǵy Jetisý memlekettik ýnıversıteti qazaq tili men ádebıeti kafedrasynyń oqytýshysy, fılologıa ǵylymdarynyń kandıdaty, dosent Saılaý Qojaǵulov, fılosofıa doktory Aına Raxımova qazaq tilin latyn álipbıine kóshirýge qatysty oń kózqarastary men tujyrymdy oı pikirlerin bildirdi. Jıynǵa qatysýshylar tarapynan qoıylǵan saýaldarǵa jaýap berdi.
Jıynda Túrgen aýyldyq okrýgi ákimi apparatynyń jetekshi mamany Anastasıa Vezner qazaq tilin latyn árpine kóshirýge qatysty oıyn bildirdi.
– Latyn álipbıine kóshý – qazaq halqynyń alǵa jyljýyna, jańa zaman talabyna saı ósip-órkendeýine, bolashaqta elimizdiń jan-jaqty damýyna úlken úles qosyp, jemisi men jeńisin ákeleri sózsiz. Biz latyn álipbıine kóshe otyryp, órkenıetti elderdiń qataryna qosylyp, tilimizdegi dybystyq júıelerdi naq anyqtap, qazaq tiliniń jazylýy men dybystalý kezinde sózder qoldanysyndaǵy artyq kirme sózderden arylamyz. Sondyqtan latyn álipbıine kóshý biz úshin, bolashaq úshin áldeqaıda mańyzdyraq, – deıdi.
Jıynǵa qatysýshy jastar tarapynan «latyn grafıkasyna kóshýde óleńdegi uıqastan aıyrylyp qalmaımyz ba?» degen saýal qoıyldy. Bul turǵyda fılosofıa doktory Aına Maratqyzy ondaı qaýiptiń bolmaıtynyn aıtyp, naqty túsinikteme berdi.
– Bizdiń sózimiz ózgermeıdi, bizdiń dybysymyz ózgermeıdi, bizdiń tilimiz de ózgermeıdi. Ózgeretini tek jazýymyz ǵana , – dedi ol.
Osy jıynda sóz alǵan aqyn, oblystyq «Jetisý» gazeti bas redaktorynyń orynbasary Jumataı Ospanuly latyn álipbıine kóshýge qatysty kópshilik qoıǵan saýaldarǵa óleńmen jaýap qaıtarýdy uıǵardy.
Keri pikir oıyńdy kóktetpeıdi,
Alǵyr urpaq bıikke jetsek deıdi.
Qazaq eli latyn tiline kóshse eger,
Rústem «Rýıstem» bolyp ketpeıdi.
Demeımin jastar sózin maıdalady,
Alǵyr jas bolashaqqa saı bolady.
Qazaq eli latynǵa kóshken kúni
Alfıa Álfıaǵa aınalady.
Qudaıǵa shúkir, alǵa qaraı kósh júredi,
Kósh júrgen saıyn elge es kiredi.
Qazaq eli latynǵa kóshken kúni,
Asel degen bizge Ásel bolyp estiledi.
«Qazaq tilin latyn álipbıine kóshýi – órkenıetke jol ashady» atty taqyrypta ótken basqosý aýdan ónerpazdarynyń konserttik baǵdarlamasyna ulasty.
