Óskemen qalasynda "Azamattarǵa arnalǵan úkimet" memlekettik korporatsiiasy KEAQ filialy direktorynyń burynǵy orynbasary A.A. Rahymjanov pen D.M. Nurtazin 4 jylǵa bas bostandyǵynan aiyryldy, dep habarlaidy dalanews.kz.
QMA deregenishe, olar Ulan aýdanyndaǵy Shybyndy ýchaskesinde altyndy zańsyz óndirý shemasyn uiymdastyrǵan. Osy maqsatta ózderine baǵynyshty EastGoldStone JShS-ny paidalanǵan. Bul seriktestiktiń qatty paidaly qazbalardy barlaýǵa ǵana litsenziiasy bolǵan. Altyn aýyr tehnikanyń - ekskavatorlar, tiegishter, sondai-aq, jýý jabdyǵynyń kómegimen óndirilgen.
Zańsyz óndirilgen altyn kólemi 15 keliden asqan, onyń quny 844 mln teńgeden joǵary. Tergeý barysynda quny 382 mln teńge bolatyn 6,7 keli altyn, 579 gramm kúmis tárkilengen. Qylmystyq áreket qorshaǵan ortaǵa eleýli ziian keltirgen. Búlingen jer aýmaǵy - 18,2 gektar.
Zańsyz áreket barysynda memlekettik orman qoryna jatatyn aǵashtar men butalar joiylǵan. Ekologiialyq zalaldy joiýǵa qajet jumystardyń quny 300 mln teńgeden asady.
Sot sheshimimen quny 372 mln teńge bolatyn múlik tárkilendi. Onyń ishinde 4 júk kóligi, 2 ekskavator, 2 tiegish, gidrojýý qurylǵysy, sondai-aq, 10 mln teńge jáne 56 myń AQSh dollary kólemindegi qolma-qol aqsha bar. Úkim zańdy kúshine engen joq.
