"Tek jergilikti kadrlardy daiyndaýǵa bolady demeńizder. Kásibi bilimi bar artister men rejissersiz jóni túzý teatr qurylmaidy. Al Almaty men Astana institýttarynda oqyp, úlken qalalardyń aýasy men aýrasyn boiyna sińirip, kásibi teatr, kino, serial, jarnama, dybystaý indýstriiasynyń tek sonda ǵana damyǵanyn bilip, sezip úlgergen jas ártister shalǵai jerge ólse barmaidy. Sondyqtan, qumnan qamal salmai, shamaly jerge túseiik. Ázirge jer-jerge Astana men Almatydan, oblystyq teatrlardan gastroldik trýppalardy jiberip turý dástúrin jandandyrǵan anaǵurlym tiimdi ma deimin. Ol, bir jaǵynan shalǵaidaǵy teatr repertýarynyń árkelkiligin qamtamasyz etedi. Qoiylymdar sapasyn arttyrady. Birde Áýezov teatry kelse, keleside Qýanyshbaev teatry óner kórsetedi. Odan soń Abai atyndaǵy opera teatry barsyn. Ekinshi jaǵynan bul aýyldyq, aýdandyq jerde turatyn halyqtyń talǵamyn ósiredi, teatr ónerine degen qyzyǵýshylyǵyn arttyrady. Nesi jaman?", deidi jýrnalist.
"Táýelsizdik jyldarynda mádeniet salasynda kóp jumys atqaryldy. Klassikalyq jáne zamanaýi mýzykaǵa arnalǵan sáýletti ǵimarattar salyndy. Kóptegen teatr ashyldy.Qazaqstanda teatr ónerine qyzyǵýshylyq artyp keledi. Zal kórermenge toly, qoiylymdardyń premerasyna biletter eki-úsh apta buryn satylyp ketedi. Sahna ónerine qushtar jandardyń arasynda jastardyń kóp bolýy kóńilge erekshe qýanysh uialatady.
Qazir Qazaqstanda 46 aimaqtyq teatr bar. Alaida onyń kópshiliginiń jai-kúii máz emes. Mysaly, Semeide bir ǵimaratta úsh birdei teatr syǵylysyp otyr. Ásirese, aimaqtarda teatrlardy damytýǵa basa nazar aýdarý kerek. Halqymyzdyń mádeni áralýandyǵyn saqtaýǵa múmkindik beretin orys jáne basqa da ulttyq teatrlardy qoldaý mańyzdy.Elimizde ónerdiń bul túri de tabys ákeletinin dáleldep júrgen jeke teatrlar az emes. Sondyqtan biznes ókilderin aimaqtaǵy teatrlarǵa belsene qoldaý kórsetýge shaqyramyn", dedi Memleket basshysy.
