"Тек жергілікті кадрларды дайындауға болады демеңіздер. Кәсіби білімі бар артістер мен режиссерсіз жөні түзу театр құрылмайды. Ал Алматы мен Астана институттарында оқып, үлкен қалалардың ауасы мен аурасын бойына сіңіріп, кәсіби театр, кино, сериал, жарнама, дыбыстау индустриясының тек сонда ғана дамығанын біліп, сезіп үлгерген жас әртістер шалғай жерге өлсе бармайды. Сондықтан, құмнан қамал салмай, шамалы жерге түсейік. Әзірге жер-жерге Астана мен Алматыдан, облыстық театрлардан гастрольдік труппаларды жіберіп тұру дәстүрін жандандырған анағұрлым тиімді ма деймін. Ол, бір жағынан шалғайдағы театр репертуарының әркелкілігін қамтамасыз етеді. Қойылымдар сапасын арттырады. Бірде Әуезов театры келсе, келесіде Қуанышбаев театры өнер көрсетеді. Одан соң Абай атындағы опера театры барсын. Екінші жағынан бұл ауылдық, аудандық жерде тұратын халықтың талғамын өсіреді, театр өнеріне деген қызығушылығын арттырады. Несі жаман?", дейді журналист.
"Тәуелсіздік жылдарында мәдениет саласында көп жұмыс атқарылды. Классикалық және заманауи музыкаға арналған сәулетті ғимараттар салынды. Көптеген театр ашылды.Қазақстанда театр өнеріне қызығушылық артып келеді. Зал көрерменге толы, қойылымдардың премьерасына билеттер екі-үш апта бұрын сатылып кетеді. Сахна өнеріне құштар жандардың арасында жастардың көп болуы көңілге ерекше қуаныш ұялатады.
Қазір Қазақстанда 46 аймақтық театр бар. Алайда оның көпшілігінің жай-күйі мәз емес. Мысалы, Семейде бір ғимаратта үш бірдей театр сығылысып отыр. Әсіресе, аймақтарда театрларды дамытуға баса назар аудару керек. Халқымыздың мәдени әралуандығын сақтауға мүмкіндік беретін орыс және басқа да ұлттық театрларды қолдау маңызды.Елімізде өнердің бұл түрі де табыс әкелетінін дәлелдеп жүрген жеке театрлар аз емес. Сондықтан бизнес өкілдерін аймақтағы театрларға белсене қолдау көрсетуге шақырамын", деді Мемлекет басшысы.
