Buǵan Atyraýdaǵy nevrolog dáriger Emiliia Grechaniktiń oqiǵasy dálel dep habarlaidy Dalanews.kz.
Grechanikten syr sýyrtpaǵan Russia Today tilshisi áieldiń ishi-baýyryna kirip, áldeqashan umyt bolǵan daýdy qaita tutatypty.
Grechanik oryssha sóilegeni úshin sorlaǵanyn, qazaq ultshyldarynan qaimyqqandyqtan kameranyń aldynda keshirim suraýǵa májbúr bolǵanyn, bul áreketke amalsyzdan barǵanyn aitady.
Russia Today-dyń aitaǵyna ergen áiel ultshyldardyń ústinen prezident Qasym-Jomart Toqaev pen kúshtik qurylymdarǵa aryz jazýǵa oqtalyp otyr.
“Osydan bir jyl oǵan áldekim telefon shalyp, memlekettik tilde sairai bastaidy. Keiin onyń atyshýly ultshyl Rýza Beisenbai ekeni anyqtalady.
Grechanka oǵan óz tilinde jaýap qatqan. Ekeýi bir-birin jaqsy túsingenimen, sálden soń Beisenbai dárigerden qazaqsha sóileýdi talap etip, oǵan moral soǵa bastaidy. Munymen baiyz tapsa bir jón.
Artynsha oǵan taǵy bir ultshyl Qýat Ahmetov habarlasyp, qazaq tilin kemsitkeni úshin kamera aldynda keshirim suraýyn talap etedi”, – deidi álgi áieldi Qazaqstandaǵy til maidanynyń qurbany etip kórsetýdi kózdegen RT.
“Qýat meniń sońyma túsip aldy. Qysym kórsetti. Meniń ústimnen Bas prokýrorǵa shaǵym túserin, jeke málimetimdi jelige júkteitinin aityp, bopsalaýǵa deiin bardy”, – deidi Grechanik.
Aqorda ideology, “atyshýly” Dáýren Abaevtyń túneýkúngi málimdemesi memlekettik tildiń tuǵyrǵa qonýyn qalamaityn aýditoriiaǵa til bitirgen túri bar.
Buǵan Kremldiń aralasýy printsipti túrde qazaqsha sóilegisi kelmeitin aýditoriianyń shyn álpetin áshkerelegen syńaily.
Máselen biz sóz etip otyrǵan keiipker "áýelde, keshirim suraǵym kelmep edi" deidi.
Negizinen qazaqtildi qaýymnyń úlesi basym Atyraý óńirinde tek orys tilinde qyzmet kórsetip úirengen Grechanik qoǵamnyń qazaqtanyp jatqanyn qabyldai almaitynyn ańǵartypty.
“Jumysta oryssha sóilegenim úshin sógis estidim. Syiaqymdy bermei, zar iletti. Qýat Ahmetov memorgandarǵa shaǵym túsirgennen keiin qýdalaýǵa ushyradym. Bul qazaqsha sóilemeitin qaýymǵa jasalǵan shabýyl. Óz basym adam alalamaimyn. Tegine, tiline qaramai aldyma kelgenge kómegimdi kórsetýge tyrysamyn”, – dep jalǵan sóilegen eken Grechanik.
Eń qyzyǵy…
Syrt kózge ózin jazyqsyz, jábirlenýshi retinde kórsetkisi kelgen Grechanik memlekettik til týraly zańdy óreskel buzǵanyn umytyp ketse kerek.
Onyń “qýdalaýǵa” ushyraýyna “Til maidany” belsendisi Qýat Ahmetovtiń túk qatysy joq, qazaqsha sóilegen klientterdiń keýdesinen keri iteretinin Atyraý turǵyndary alǵashqy bop aitqan.
Byltyrǵy jyldyń shildesinde Atyraý oblysy, Jylyoi aýdanynyń turǵyny oblystyq Meditsinalyq-áleýettik saraptamany baqylaý jáne metodologiia bóliminiń basshysy Emiliia Grechaniktiń ústinen aimaq basshysy Mahambet Dosmuhambetovke aryz jazady.
Telefon tutqasyn kótergen osy mekemeniń basshysy turǵynnan oryssha sóileýdi talap etip jáne memlekettik tilde qyzmet kórsetpeitinin aityp, tutqany tastai salǵan.
“Keiin men qaita soqqanda menimen kómekshisin tilmash retinde paidalaný arqyly sóilese batady da túski úzilis bastalǵanǵa deiin telefonnyń ar jaǵynda jaýap bermei kúttirip otyryp aldy.
Men tústen keiin taǵy da osy sharýamen habarlasyp, bólim bastyǵynyń orynbasarynyń aralasýymen ǵana qyzmet ala aldym.
Memlekettik tilde qyzmet kórsete almaǵany úshin, tutynýshydan oryssha sóileýdi talap etkeni úshin jáne tutqany laqtyryp dórekilik tanytqany úshin Meditsinalyq-áleýettik saraptamany baqylaý jáne metodologiia bóliminiń bastyǵy Grechanik Emiliia Ilinichnaǵa ákimshilik jaza taǵaiyndalýyn talap etemin”, – degen bolatyn jábirlenýshi Klara Kenjalieva.
Osyǵan bailanysty Atyraý oblysy tilderdi damytý jónindegi basqarmasy E.Grechaniktiń teris is áreketine bailanysty QR Memlekettik qyzmet isteri Agenttiginiń Atyraý oblysy boiynsha departamentimen birigip E.Grechaniktiń qatysýymen arnaiy kezdesý ótkizip, oǵan QR Konstitýtsiiasy, til týraly, memlekettik qyzmet týraly zańnamalaryn jáne jeke jáne zańdy tulǵalardyń ótinishterin qaraý tártibin buzǵandyǵy jóninde túsindirý jumystaryn júrgizgen.
Nátijesinde E.Grechanik óz qatesin túsinip, Klara Kenjalievadan áleýmettik jeli arqyly keshirim suraǵan.
E.Grechanikti tártiptik jazalaýǵa tartý máselesimen Memlekettik qyzmet ister Agenttiginiń jergilikti departamenti ainalysatynyn málimdegen.
Ázirlegen, Dýman BYQAI
