Turmysy túzele bastaǵan Kentaý qalasy Ashysai aýylynda kósheler jóndeýden ótip, jaryqtandyrylǵan. Ótken ǵasyrdyń 60 jyldary salynǵan mádeniet oshaqtary da aǵymdaǵy jóndeýden ótip, keńinen paidalanylýda.
«Jańa sport alańdary salynyp, balalardyń bos ýaqyttaryn tiimdi ótkizýine jaǵdai jasalǵan. Jergilikti óz-ózin basqarý zańynyń aiasynda aýyl biyl óz biýdjetindegi 1 mln. 750 myń teńgege balalar alańshalaryn salýdy josparlapty. Turǵylyqty halyqty aýyz sýmen qamtý kezeńimen júzege asýda»,- deidi Ashysai aýylynyń ákimi Qairat Qabylbekov.
Aýyl ákimdigi Jankeldin kóshesin aǵymdaǵy jóndeýden ótkizip, tozyǵy jetken ortalyq saiabaqty jańalamaq. Ashysaida turatyn 2 myńnan astam halyqtyń 93-i jumyssyz, 254 -i vahtalyq ádispen jumys jasaidy.
Qalǵandaryn turaqty jumyspen qamtý baǵytynda, aýyldy órkendetý maqsatynda qytailyq investor tartylypty.
Nysanbai Kenjebaev, Qytai investorlarlarynyń Túrkistandaǵy ókili:
«Qytailyq investorlar óndiris qaldyqtaryn óńdeitin kásiporyn ashý baǵytynda Túrkistanda jumys jasaýda. Olar byltyr bankte kepildikte turǵan, bankrotqa ushyraǵan Ashysai polimetall kombinatyn aýktsionda 61 mln. teńge quiyp satyp aldy. Shikizatsyz óndiris bolmaidy. Sondyqtan bul jaǵyn da sheteldikter qamtyǵan».
Qytailyqtar ozyq tehnologiialardy paidalanyp, Shymkenttegi qorǵasyn zaýytynyń jaramdy qaldyqtaryn óńdep, arasynan 15-17 paiyz qorǵasyn, myryshyn alyp álemdik naryqqa shyǵarady degen josparmen kelipti. Birinshi óńdeý óndiris orny valts peshi Badamdaǵy indsýtrialdy aimaqtaǵy 15 gektarda ornalastyrylsa, ekinshi óńdeý óndirisi- shahta peshi osy Ashysaida ornalasady.
Atalǵan kásiporyndarda jergilikti mamandardyń úlesi 90 paiyzdy qurasa, qalǵany sheteldikter. Shlaktyń qory bes jylǵa jetetinin qytailyqtar anyqtaǵan. Shlak taýsylsa, Ashysaidaǵy qazba bailyqtary alynyp, óndeýden ótkiziledi. Uzaq merzimdi jobany júzege asyrý 25 jyldy qamtymaq.
