Memleketten 235 920 teńge kólemindegi bastapqy kapitaldy alý úshin ne isteý kerek? Ol úshin 2025 jyldyń 12 mamyrynan bastap Otbasy bankinde "AQYL" bilim berý jinaqtaý salymyn ashý qajet. 2025 jyly memleketten beriletin, 235 920 teńgeden bastalatyn bastapqy bilim berý kapitaly biyl 5 jasqa tolatyn balalarǵa esepteletin bolady, dep habarlaidy Dalanews.kz.
"AQYL" depoziti birneshe jolmen ashylady:
- Baspana market portalynda. Ol úshin otbasybank.kz saityndaǵy jeke kabinetińizge kirińiz, "Meniń bankim" qoiyndysyn ashyp, "Depozitterge" ótý kerek. Ári qarai, "Jańa depozit" batyrmasyn basyp, "AQYL" salymyn ashasyz;
- Otbasy banktiń "Otbasy bank" mobildi qosymshasynda. Ol úshin mobildi qosymshada "Meniń bankim" batyrmasyn basyp, "Jańa depozitti ashý" qoiyndysyna ótip, "AQYL" depozitin tańdaý kerek;
- Bank bólimshelerinde;
- Keńesshilerdiń kómegimen. Myna silteme arqyly ózińiz qalaǵan keńesshini tańdai alasyz:
"Qazaqstanda "Keleshek" atty balalarǵa arnalǵan jańa erikti jinaqtaý júiesi jumys istei bastady. Memleket onyń qatysýshylaryna JOO nemese kolledjde oqý aqysyn tóleý úshin bastapqy kapital qurýǵa kómektesedi. Ony saqtaý jáne kóbeitý úshin balalardyń ata-analary jyl saiyn jinaq jasaýlary qajet. "Keleshek" baǵdarlamasy 0-5 jasqa deiingi barlyq kishkentai qazaqstandyqtardy qamtidy", - deidi Otbasy banktiń baspasóz qyzmeti.
"Keleshek" baǵdarlamasy aiasynda balalarǵa memleketten qansha soma alýǵa bolady?
- Bastapqy bilim berý kapitaly 2025 jyly 60 AEK nemese 235 920 teńgeni quraidy.
- Jetim balalar men ata-anasynyń qamqorlyǵynsyz qalǵan balalar úshin bastapqy bilim berý kapitaly 2025 jyly 120 AEK nemese 471 840 teńgege teń.
Al buǵan deiin Otbasy bankinde "AQYL" depozitterin ashqan adamdar 2025 jyldyń birinshi jartyjyldyǵynda ata-ana 2025 jyldyń 15 mamyrynan bastap 2025 jyldyń 30 maýsymyna deiin Baspana market portalyndaǵy (otbasybank.kz) nemese Otbasy bank mobildi qosymshasyndaǵy Jeke kabinette "AQYL" depozitine qosymsha kelisimge qol qoiýlary qajet. Bul jaǵdaida bastapqy bilim berý kapitaly qoldanystaǵy depozitke esepteledi. Aqsha 2025 jyldyń 31 tamyzyna deiin túsedi.
1 shilde men 31 jeltoqsan aralyǵynda 5 jasqa tolatyn balalar da biylǵy jyly qosymsha kelisimge qol qoiýy kerek. Qarajat 2026 jyldyń 28 aqpanyna deiin túsedi.
2025 jyly "AQYL" depozitiniń sharttary qandai?
2025 jyldan bastap "AQYL" bilim berý jinaqtaý salymyn avtomatty túrde uzartýmen keminde 1 jyl merzimge ashýǵa bolady.
Zań depozittiń jyldyq tiimdi mólsherlemesin retteidi. Endi bul Ulttyq Banktiń bazalyq mólsherlemesine bailanysty. Mysaly, qazirgi ýaqytta QR UB bazalyq mólsherlemesiniń deńgeii 16,5% quraidy, demek, salym merzimi 1 jyl bolǵanda depozit boiynsha JTSM 14,5%-dan tómen bolmaidy. Depozit jańa merzimge uzartylǵan kezde, JTSM qoldanystaǵy bazalyq mólsherlemege sáikes avtomatty túrde ózgeredi. Banktiń eseptelgen syiaqysy ai saiyn kapitaldandyrylady. Bul oǵan da banktiń syiaqysy esepteletinin bildiredi.
Sonymen qatar, memleket jyl saiyn "AQYL" depozitterine syilyqaqy esepteidi. Salymshylardyń barlyq sanattary úshin ol 5% teń. Jetim balalarǵa, ata-anasynyń qamqorlyǵynsyz qalǵan balalarǵa, múmkindigi shekteýli balalarǵa, kóp balaly otbasylardan shyqqan jáne az qamtylǵan otbasylardan shyqqan balalarǵa ashylǵan depozitterge 7% mólsherinde memlekettik syilyqaqy esepteletin bolady.
Jyl saiyn depozitke esepteletin syilyqaqynyń eń joǵary mólsheri - 100 AEK (2025 jylǵa 393 200 teńge).
Memlekettik syilyqaqy jinaqtaýdyń eń az merzimi 1 jyl bolǵanda esepteledi, iaǵni ony alý úshin salym bir jylǵa tolýy tiis.
Eger siz depozitti 2025 jyldyń aqpanynda ashqan bolsańyz, onda memlekettik syilyqaqy tek 2027 jyly esepteledi, óitkeni 2026 jyldyń 1 qańtarynda sizdiń depozitińizge nebári 11 ai bolady.
Depozitti ashý kezinde mindetti bastapqy jarnanyń mólsheri 3 AEK nemese 11 796 teńgege teń (2024 jyly). Jetim balalar úshin bastapqy jarna joq.
Qandai jaǵdailarda memleketten bólingen bastapqy kapital biýdjetke qaitarylady?
- Memlekettiń bastapqy kapitaly "AQYL" depozitine aýdarylady.
- Ony saqtaý úshin ata-analar "AQYL" depozitine balalary kámeletke tolǵanǵa deiin nemese bilim berý uiymyna túskenge deiin jyl saiyn jarna salyp turýlary qajet.
- Bir jyldaǵy eń tómengi jarna 24 AEK nemese 2025 jyly 94 368 teńge.
- Halyqtyń áleýmettik osal toptary sanatyndaǵy balalar úshin - 2025 jyly 12 AEK nemese 47 184 teńge.
- Jetim balalar men ata-anasynyń qamqorlyǵynsyz qalǵan balalarǵa ashylǵan "AQYL" depozitine jyl saiyn mindetti jarnalar salýdyń qajeti joq.
- Jarnalardy bir ýaqytta bir somamen aýdarýǵa nemese jyl boiyna bólshektep salýǵa bolady – eń bastysy, jyl sońyna deiin eń tómengi jarnany engizý sharty saqtalýy kerek.
- Bastapqy bilim berý kapitaly salymǵa qabyldanǵannan keiin engizilgen jarnalar ǵana eskeriletinin nazarǵa alýdy suraimyz. Bastapqy bilim berý kapitalyn qabyldaǵanǵa deiin shotta bolǵan jinaqtar esepke alynbaidy.
- Al eger jyl qorytyndysy boiynsha qajetti soma engizilmese, onda memleketten 60 AEK nemese 235 920 teńge mólsherindegi bastapqy kapital biýdjetke qaitarylady.
Memleketten berilgen bastapqy kapitaldy qalai jumsaýǵa bolady?
Bastapqy kapital, ata-analardyń jarnalary, bank syiaqysy jáne memlekettik syilyqaqy "AQYL" depozitinde biriktirilip jinaqtalady. Bala 18 jasqa tolǵanda, bul somany Qazaqstanda nemese shetelde bilim alý aqysyn tóleýge qoldanýǵa bolady.
Eger bul soma bilim berý aqysyn tóleýge jetkiliksiz bolsa, onda EDB-de nemese "Qarjy ortalyǵy" AQ arqyly jetispeitin somaǵa bilim berý nesiesin alýǵa bolady.
Eger depozit ustaýshy bilim berý grantyn alsa, onda diplom alynǵannan keiin depozitte jinaqtalǵan qarajatty (banktiń kapitaldandyrylǵan syiaqysyn, memlekettik syilyqaqy men bastapqy bilim berý kapitalyn eskere otyryp) kelesidei paidalanýǵa bolady:
1) bilim berý jinaqtaý salymynda qarajat jinaqtaýdy jalǵastyra berýge bolady;
2) jinaqtardy aǵa-baýyrlarǵa, apa-sińlilerge, týystarǵa, dostarǵa jáne t.b. berýge bolady;
3) bilimniń basqa deńgeili túrlerin alý maqsatynda bilim berý qyzmetterine aqy tóleýge bolady;
4) turǵyn úi jaǵdailaryn jaqsartý úshin Otbasy bankindegi depozitke qarajat aýdarýǵa bolady.
"Keleshek" baǵdarlamasyna bankter men saqtandyrý kompaniialary sipatynda 10 uiym qatysady:
- Qazaqstan Halyq banki;
Jusan bank;
Otbasy bank;
Nurbank;
VTB Bank;
"Evraziia" saqtandyrý kompaniiasy;
Freedom Finance Life;
"Halyk-Life";
Standard Life;
Nomad Life.
