Almaty oblysy Kegen aýdanynda qudyqtan úsh adamnyń máiiti shyǵaryldy. Úiinde sý toqtap qalǵan soń, ákesi 15 jastaǵy ulyn ertip alyp úiiniń janyndaǵy qubyrdy teksermek bolypty. Qasynda kórshisi bolǵan. Qudyqqa birinen keiin biri túsip, shyǵa almai qalǵan, - dep habarlaidy Dalanews.kz "KTK" telearnasyna siltep.
Marqumdardyń týystary bul jáitqa asfalt tóseý kezinde kommýnaldyq jeliniń durys ornatylýyn qadaǵalamaǵan jergilikti ákim-qarany kináláp otyr.
"Birinshi inimdi alyp shyqty. Qarasaq, denesi sýyp ketken. Birinshi kómekten keiin qusyp jiberip, kózin ashty ... boldy. «Júrip ketken» dedi. Odan keiin Serik degen aǵany shyǵardy. Órt sóndirýshiler sýdy sorǵyzyp, balany shyǵaryp aldy. Ol kezde bala kógerip ketken", - deidi marqumnyń týysy Dina Aitbaeva.
Telearna málimetinshe, áý basta Qudyqty bir qarap shyǵýǵa 15 jastaǵy jasóspirim túsken eken. Biraq kóp uzamai sonda talyp qalady. Ákesi qutqarýǵa umtylǵanymen, keri shyǵa almai, es-tússiz qulaǵan. Artynan 56 jastaǵy kórshisi túsip, ol da tómende til tartpai ketken.
Týystarynyń shyryldap otyrǵany - qudyqtyń beti kólik júretin joldan bir qarys tómen ornalasqany. Topyraqpen kómilip jatqanyna bir aidan asypty. Biteý turyp, aýa ainalymy júrmegendikten, ishinde ýly gaz paida bolýy múmkin eken.
"Sý júrgizilgennen keiin jol salynǵan kezde tehnologiia boiynsha qudyqtyń beti kóterilip turý kerek. Jol salǵan merdiger kóterip, asfaltpen birdei jasap ketý kerek bolatyn. Turǵyndar qudyqtyń betin ashyp qoiǵan. Sońǵy bir jarym aida Kegen aýylynda drenajdy kanal dúrgizildi. Sol kezde qudyqtyń betin ózderiniń topyraǵymen bekitip ketken", - deidi marqumnyń týysy Maqpal Shadan.
Úsheýiniń ólimine qatysty ekinshi boljam: "qudyqtyń ishinde toq urýy múmkin" deidi týystary. Al sheneýnikter “eskertse, ózimiz aq tekseretin edik” degen. Osydan bir emes, baqandai tórt jyl buryn ústinen jol tóselip ketken qudyqty retke keltirýge adam óliminen keiin ǵana kirisken.
"2020-2021 jyldary joldy qabyldap alǵan kisi qazir qyzmette joq. Ne sebepti dál sýdyń ústine jol salyp ótkenin aita almaimyn. ...Kólikter óte alatyndai etip jasaimyz", - dedi Kegen aýdany jolaýshylar kóligi jáne avtomobil joldary bóliminiń basshysy Jasulan Kádil.
Qazir marqumdardyń denesi Qonaev qalasynda. Úsheýi metan gazyna ýlandy ma, álde toq uryp qaitys boldy ma, jaǵdai saraptama qorytyndysynan keiin belgili bolady.
