Oqys oqiǵadan kóz jumǵan úsh adamnyń denesi máiithanaǵa jiberildi. Bul aqparatty Almaty oblystyq politsiia departamenti rastady, dep habarlaidy Dalanews.kz.
Atalǵan jaǵdaiǵa bailanysty jýrnalist Dias Nuraqyn álemjelide jazba jariialady.
“Kegen aýdanynda úsh adam ashyq jatqan qudyqqa qulap kóz jumdy. Arasynda 15 jastaǵy bala da bar eken. Bul oqys oqiǵaǵa sýǵa jaýaptylar tikelei kináli. “KegenSý” mekemesiniń bylyǵyn aldaǵy ýaqytta bólek jazamyn. Tek aqsha jinaýdy biledi olar. Beibit kúnde baqilyq bolǵandardyń otbasyna sabyr bersin” - dep jazady ol.
Al Qaz365.kz tilshisi jergilikti jýrnalist Maqpal Shadanmen sóilesken. Ol oqiǵanyń qalai bolǵanyn baiandap berdi.
“Shamamen úsh saǵat buryn “Kegen Sý qubyry” mekemesine qarasty aýrýhananyń mańyndaǵy kóshedegi qudyqtardyń birine Kegen aýylynyń bir turǵyny 15 jastaǵy balasymen túsip ketken. Bul jerde másele bylai bolyp tur: aýrýhana mańyndaǵy kóshede biraz jyl buryn jol jasalǵan. Sol jol jasalǵan kezde esh jerde qudyqqa qatysty talaptar saqtalmaǵan. Sebebi ishinen asfalt tóselgen kezde ol asfalt jerdiń betine jetkizilip, kóterilýi kerek bolǵan. Ondai eshteńe júrgizilmei, betine asfaltmen tósep ketken. Sýmen jii problema bolady. Sondyqtan, turǵyndar qudyqty ashyp, asfaltty oiyp, ashyp qoiǵan”, - deidi ol.
Jýrnalistiń aitýynsha, eki-jyl boiy sol qudyqqa eshkim qaramaǵan. Apattyq jaǵdai bolmasyn dep, pakryshka tastap ketken. Bir jarym ai buryn Kegende jerasty kanal salyndy. Salynǵan kezde qudyqtyń betin bekitip ketken. Úide sý bolmai qalǵan kezde eki turǵyn qudyqtyń betin qazyp ashqan kezde túsip ketken.
“Qaitys bolǵan bir adam 1966 jylǵy Serik degen azamat. Ekinshisi 1981 jylǵy Serikbai Aitbaev. Odan keiin Jumabek Maqsat Serikbaiuly – 9 synyp oqýshysy. Qudyqtyń tereńdigi 1,5 metr ǵana. Úsheýi de ýlanyp qaitys bolǵan”, - dedi Maqpal Shadan.
Politsiia atalǵan derekti rastady.
“Bul derek Kegen aýdanynyń politsiiasynda tirkeldi. Qaitys bolǵan adamdardyń deneleri máiithanaǵa jiberildi, sot-meditsinalyq saraptama taǵaiyndaldy”, - dep habarlady oblystyq PD baspasóz qyzmeti.
