Qazaqstan shahmat federasıasy 2024 jylǵy jetistikteri úshin elimizdiń shahmatshylar qaýymynyń úzdik ókilderiniń esimderip atap, marapattady. Sheraton Astana Hotel zalynda ótken KazChess Awards — elimizdiń basty shahmat júldesin saltanatty tabys etý rásiminde sportshylar, jattyqtyrýshylar, ardagerler, tóreshiler, medıa jáne memlekettik qurylymdardyń ókilderi bas qosty, – dep habarlaıdy Dalanews.kz
Keshti ashqan Qazaqstan shahmat federasıasynyń prezıdenti Tımýr Týrlov elimizdiń mádenı jáne sporttyq murasy úshin shahmattyń erekshe mańyzdy ekenin atap ótti. Ol Qoǵamdyq marapat: «Úmit» («Nadejda») ordenin Qazaqstan tarıhyndaǵy eń jas grosmeıster 14 jasar Edgar Mamedovke jáne «Dara» («Ýnıkalnyı») ordenin erler arasyndaǵy grosmeıster ataǵyn ıelengen el tarıhyndaǵy ekinshi shahmatshy qyz Bıbisara Asaýbaevaǵa tabys etti.
«Ár marapattyń artynda myńdaǵan saǵat qajyrly eńbek, ózine sený jáne jaqyn adamdardyń qoldaýy jatyr. Bul chempıon rýhynyń qudiretin kórsetetin jáne basqalarǵa shabyt syılatyn hıkaıalar. Biz ár laýreattyń jetistikterin ǵana emes, árqaısysynyń júrip ótken jolyn atap qurmet kórsetýge qýanyshtymyz. Sońǵy bir jyldyń ishinde talaı ret shahmatshylarymyzdyń jetistikterine kýá bolǵan biz muny maqtan tutamyz. Olar boıyndaǵy talanty men tabandylyǵynyń, sondaı-aq jattyqtyrýshy, uıymdastyrýshy, mesenattardyń, ıaǵnı kadrdyń syrtynda júrip Qazaqstan shahmat mektebiniń ósýi men órkendeýin múmkin etetin barlyq adamdardyń orasan zor eńbeginiń arqasynda osynaý zor jeńiske jetip otyr», – dep atap ótti Qazaqstan shahmat federasıasynyń prezıdenti Tımýr Týrlov.
KazChess Awards 2025 laýreattary:
- Halyqaralyq arenadaǵy úzdik debút — Nuráli Bolashaqov
• KazChess/QSHF úzdik fılıaly — Aqtóbe oblysy, Gúlqasıma Súıentaeva
• Jyl ıýnıory (ul balalar) — Mark Smırnov
• Jyl ıýnıory (qyz balalar) — Alanna Berikqyzy
• Erekshe sportshy — Álimjan Aıapov jáne Samajan Kettebekov
• Úzdik ardagerler — Vladıslav Nasybýllın jáne Álfıa Tórebaeva
• Úzdik tóreshi — Serikbaı Temirbaev
• Jyldyń shahmat ambassadory — Ivan Chervınskıı, @alga.peterburg
• Medıa arasyndaǵy jyl seriktesi — Arman Qorjynbaev, «Delovoı Kazahstan»
• Jyl komandasy — Qazaqstannyń áıelder quramasy: Bıbisara Asaýbaeva, Merýert Kamalıdenova, Ksenıa Balabaeva, Alýa Nurman, Ámına Qaıyrbekova; jattyqtyrýshylary Pavel Kosýr jáne Aleksandr Moıseenko
• Erler arasyndaǵy úzdik sportshy — Qazybek Nógerbek jáne onyń jattyqtyrýshysy Erjan Shákenov
• Úzdik sportshy qyz — Bıbisara Asaýbaeva
• Úzdik jattyqtyrýshy — Pavel Kosýr
• Prezıdent tańdaýy — Elnaz Qalıahmet
Mark Smırnov pen Alanna Berikqyzy «Úmit» ordenderimen, al Merýert Kamalıdenova, Ksenıa Balabaeva, Alýa Nurman, Ámına Qaıyrbekova, Pavel Kosýr, Aleksandr Moıseenko, Qazybek Nógerbek jáne Erjan Shákenov «Dara» ordenderimen marapattaldy.
«BMP Live Band» toby men Marsel Alseıitov «Bul ómirde» hıtin oryndap, keshte tamasha mýzykalyq kóńil-kúı ornatty. İs-shara sońynda konfettı salúti atyldy, al qonaqtardyń barlyǵynyń birge fotosýretke túsýi shahmatshylar qoǵamdastyǵynyń birliginiń nyshany ispetti boldy.
Eske salaıyq, KazChess Awards syılyǵyn tabys etý rásimi 2023 jyldan bastaý alady. Almatyda ótken tuńǵysh saltanatty rásimde 9 nomınasıa boldy, sol kezden bastap shahmattyń damýyna úles qosyp jatqan jandardy ádil irikteý jáne marapattaý dástúri qalyptasty. Alǵashqy laýreattar qatarynda Bıbisara Asaýbaeva, Rınat Jumabaev, Jansaıa Ábdimálik, Dınara Sádýaqasova jáne Qazybek Nógerbek boldy.
2024 jyly syılyqtyń aýqymy 12 sanatqa deıin keńeıdi, al 2025 jyly 15-ke jetti. Bul elimizdegi shahmat qozǵalysynyń óskenin kórsetedi: ótken jyldyń ózinde ǵana Qazaqstan shahmatshylary ár túrli halyqaralyq jarysta rekordtyq 160 medal (55 altyn, 54 kúmis, 51 qola medal) jeńip aldy.
KazChess Awards syılyǵynyń Qazaqstan shahmatynyń «Oskary» dep atalýy oryndy – óıtkeni bul jaı ǵana marapat emes, tabysqa jetýdiń nyshany, jas sportshylar úshin tamasha úlgi jáne búkil shahmatshylar qaýymy úshin mańyzdy marker.
Qazaqstan shahmat federasıasy jas daryn ıelerin qoldaýdy, ınfraqurylymdy jetildirýdi, sıfrlyq sheshimder engizýdi jáne álemdik deńgeıdegi bedeldi týrnırler uıymdastyrýdy odan ári jalǵastyra bermek.
