قازاقستان شاحمات فەدەراسياسى 2024 جىلعى جەتىستىكتەرى ءۇشىن ەلىمىزدىڭ شاحماتشىلار قاۋىمىنىڭ ۇزدىك وكىلدەرىنىڭ ەسىمدەرىپ اتاپ، ماراپاتتادى. Sheraton Astana Hotel زالىندا وتكەن KazChess Awards — ەلىمىزدىڭ باستى شاحمات جۇلدەسىن سالتاناتتى تابىس ەتۋ راسىمىندە سپورتشىلار، جاتتىقتىرۋشىلار، ارداگەرلەر، تورەشىلەر، مەديا جانە مەملەكەتتىك قۇرىلىمداردىڭ وكىلدەرى باس قوستى، – دەپ حابارلايدى Dalanews.kz
كەشتى اشقان قازاقستان شاحمات فەدەراسياسىنىڭ پرەزيدەنتى تيمۋر تۋرلوۆ ەلىمىزدىڭ مادەني جانە سپورتتىق مۇراسى ءۇشىن شاحماتتىڭ ەرەكشە ماڭىزدى ەكەنىن اتاپ ءوتتى. ول قوعامدىق ماراپات: «ءۇمىت» («نادەجدا») وردەنىن قازاقستان تاريحىنداعى ەڭ جاس گروسسمەيستەر 14 جاسار ەدگار مامەدوۆكە جانە «دارا» («ۋنيكالنىي») وردەنىن ەرلەر اراسىنداعى گروسسمەيستەر اتاعىن يەلەنگەن ەل تاريحىنداعى ەكىنشى شاحماتشى قىز ءبيبىسارا اساۋبايەۆاعا تابىس ەتتى.
«ءار ماراپاتتىڭ ارتىندا مىڭداعان ساعات قاجىرلى ەڭبەك، وزىنە سەنۋ جانە جاقىن ادامداردىڭ قولداۋى جاتىر. بۇل چەمپيون رۋحىنىڭ قۇدىرەتىن كورسەتەتىن جانە باسقالارعا شابىت سىيلاتىن حيكايالار. ءبىز ءار لاۋرەاتتىڭ جەتىستىكتەرىن عانا ەمەس، ءارقايسىسىنىڭ ءجۇرىپ وتكەن جولىن اتاپ قۇرمەت كورسەتۋگە قۋانىشتىمىز. سوڭعى ءبىر جىلدىڭ ىشىندە تالاي رەت شاحماتشىلارىمىزدىڭ جەتىستىكتەرىنە كۋا بولعان ءبىز مۇنى ماقتان تۇتامىز. ولار بويىنداعى تالانتى مەن تاباندىلىعىنىڭ، سونداي-اق جاتتىقتىرۋشى، ۇيىمداستىرۋشى، مەسەناتتاردىڭ، ياعني كادردىڭ سىرتىندا ءجۇرىپ قازاقستان شاحمات مەكتەبىنىڭ ءوسۋى مەن وركەندەۋىن مۇمكىن ەتەتىن بارلىق ادامداردىڭ وراسان زور ەڭبەگىنىڭ ارقاسىندا وسىناۋ زور جەڭىسكە جەتىپ وتىر»، – دەپ اتاپ ءوتتى قازاقستان شاحمات فەدەراسياسىنىڭ پرەزيدەنتى تيمۋر تۋرلوۆ.
KazChess Awards 2025 لاۋرەاتتارى:
- حالىقارالىق ارەناداعى ۇزدىك دەبيۋت — ءنۇرالى بولاشاقوۆ
• KazChess/قشف ۇزدىك فيليالى — اقتوبە وبلىسى، گۇلقاسيما سۇيەنتايەۆا
• جىل يۋنيورى (ۇل بالالار) — مارك سميرنوۆ
• جىل يۋنيورى (قىز بالالار) — الاننا بەرىك قىزى
• ەرەكشە سپورتشى — ءالىمجان اياپوۆ جانە ساماجان كەتتەبەكوۆ
• ۇزدىك ارداگەرلەر — ۆلاديسلاۆ ناسىبۋللين جانە ءالفيا تورەبايەۆا
• ۇزدىك تورەشى — سەرىكباي تەمىربايەۆ
• جىلدىڭ شاحمات امباسسادورى — يۆان چەرۆينسكيي، @alga.peterburg
• مەديا اراسىنداعى جىل سەرىكتەسى — ارمان قورجىنبايەۆ، «دەلوۆوي كازاحستان»
• جىل كومانداسى — قازاقستاننىڭ ايەلدەر قۇراماسى: ءبيبىسارا اساۋبايەۆا، مەرۋەرت كاماليدەنوۆا، كسەنيا بالابايەۆا، الۋا نۇرمان، ءامينا قايىربەكوۆا؛ جاتتىقتىرۋشىلارى پاۆەل كوسۋر جانە الەكساندر مويسەەنكو
• ەرلەر اراسىنداعى ۇزدىك سپورتشى — قازىبەك نوگەربەك جانە ونىڭ جاتتىقتىرۋشىسى ەرجان شاكەنوۆ
• ۇزدىك سپورتشى قىز — ءبيبىسارا اساۋبايەۆا
• ۇزدىك جاتتىقتىرۋشى — پاۆەل كوسۋر
• پرەزيدەنت تاڭداۋى — ەلناز قالياحمەت
مارك سميرنوۆ پەن الاننا بەرىك قىزى «ءۇمىت» وردەندەرىمەن، ال مەرۋەرت كاماليدەنوۆا، كسەنيا بالابايەۆا، الۋا نۇرمان، ءامينا قايىربەكوۆا، پاۆەل كوسۋر، الەكساندر مويسەەنكو، قازىبەك نوگەربەك جانە ەرجان شاكەنوۆ «دارا» وردەندەرىمەن ماراپاتتالدى.
«BMP Live Band» توبى مەن مارسەل السەيىتوۆ «بۇل ومىردە» ءحيتىن ورىنداپ، كەشتە تاماشا مۋزىكالىق كوڭىل-كۇي ورناتتى. ءىس-شارا سوڭىندا كونفەتتي ءساليۋتى اتىلدى، ال قوناقتاردىڭ بارلىعىنىڭ بىرگە فوتوسۋرەتكە ءتۇسۋى شاحماتشىلار قوعامداستىعىنىڭ بىرلىگىنىڭ نىشانى ىسپەتتى بولدى.
ەسكە سالايىق، KazChess Awards سىيلىعىن تابىس ەتۋ ءراسىمى 2023 جىلدان باستاۋ الادى. الماتىدا وتكەن تۇڭعىش سالتاناتتى راسىمدە 9 نوميناسيا بولدى، سول كەزدەن باستاپ شاحماتتىڭ دامۋىنا ۇلەس قوسىپ جاتقان جانداردى ءادىل ىرىكتەۋ جانە ماراپاتتاۋ ءداستۇرى قالىپتاستى. العاشقى لاۋرەاتتار قاتارىندا ءبيبىسارا اساۋبايەۆا، رينات جۇمابايەۆ، جانسايا ابدىمالىك، دينارا ءسادۋاقاسوۆا جانە قازىبەك نوگەربەك بولدى.
2024 جىلى سىيلىقتىڭ اۋقىمى 12 ساناتقا دەيىن كەڭەيدى، ال 2025 جىلى 15-كە جەتتى. بۇل ەلىمىزدەگى شاحمات قوزعالىسىنىڭ وسكەنىن كورسەتەدى: وتكەن جىلدىڭ وزىندە عانا قازاقستان شاحماتشىلارى ءار ءتۇرلى حالىقارالىق جارىستا رەكوردتىق 160 مەدال (55 التىن، 54 كۇمىس، 51 قولا مەدال) جەڭىپ الدى.
KazChess Awards سىيلىعىنىڭ قازاقستان شاحماتىنىڭ «وسكارى» دەپ اتالۋى ورىندى – ويتكەنى بۇل جاي عانا ماراپات ەمەس، تابىسقا جەتۋدىڭ نىشانى، جاس سپورتشىلار ءۇشىن تاماشا ۇلگى جانە بۇكىل شاحماتشىلار قاۋىمى ءۇشىن ماڭىزدى ماركەر.
قازاقستان شاحمات فەدەراسياسى جاس دارىن يەلەرىن قولداۋدى، ينفراقۇرىلىمدى جەتىلدىرۋدى، سيفرلىق شەشىمدەر ەنگىزۋدى جانە الەمدىك دەڭگەيدەگى بەدەلدى تۋرنيرلەر ۇيىمداستىرۋدى ودان ءارى جالعاستىرا بەرمەك.
