Búgingi kúni Ulttyq park aýmaǵynda uzyndyǵy 673 shaqyrymdy quraityn 14 týristik soqpaq jumys istep tur. Park aýmaǵynda infraqurylymdar salý boiynsha jobalaý jumystary júrgizilip jatyr.
Ulttyq tabiǵi parktiń bas direktory Janbolat Tynybekovtyń aitýynsha, qazir zoologiia ǵylymi institýtymen Katonqaraǵai ulttyq parkindegi qar barysynyń ósip-óný ortasyna, ekojúiesine zertteý jumystary odan ári júrgizilip jatyr.
2001 jyldyń shildesinde qurylǵan Katonqaraǵai ulttyq tabiǵi parki – alyp jatqan aýmaǵy jaǵynan elimizdegi eń úlken ulttyq tabiǵi park, erekshe qorǵalatyn aimaq.
Janbolat Tynybekov park quramyndaǵy 5 filial men 10 ormanshylyq jáne 6 bólim ulttyq tabiǵi parktegi ormandy qalpyna keltirý sharalaryn, orman kólemin jyl saiyn ulǵaityp otyrǵanyn, sonyń nátijesinde orman aýmaǵy 17 paiyzǵa keńeigenin atap aitty.
Sonyń nátijesinde Katonqaraǵai ulttyq parkinde zańsyz aǵash kesý faktileri azaiǵan. Orman alqaptarynda sanitarlyq sharalar júrgizilip, aýrý, qýraǵan, kári aǵashtar kesilip, alqaptar ziiankesterden aryltylyp otyr. 20 jyl ishinde park aýmaǵynda iri orman órtteri (2008 jyldaǵydan basqa) tirkelmegen. Ár jyl saiyn shekara mańyndaǵy aýmaqtar turǵyndaryna orman qory jerlerinen mal jaiýǵa (5-7 myń gektar), shóp shabýǵa (500-600 gektar) ruqsat beriledi.
«Tabiǵat jylnamasy» baǵdarlamasy aiasynda ulttyq parkte alqaptyń faýnasy, florasy boiynsha ǵylymi zertteýler de júrgizilýde. Nátijesinde park aýmaǵynda qustardyń bes jańa túri, qanatty jándikterdiń jiyrma jańa túri, sondai-aq buryn bul óńirde kezdespegen ósimdikter túri, sabanshy tabylyp, tirkelgen. 2014 jyldan bastap parkte Qyzyl kitapqa engen qar barysynyń tirshilik etý ortasyna monitoring júrgizilip jatyr.
Adam aiaǵy baspas asqaraly biikterde ǵana júretin qar barysy osy ýaqytqa deiin on shaqty ret fototuzaqqa túsken. Qar barysy 2014 jyly Arshaty ormanshylyǵy aýmaǵynan alǵash ret fototuzaqqa ilinse, ol Sarymsaqty jotasynan 2020 jyly úsh ret, biyl tipti birneshe ret fototuzaqqa túsken.
Aita ketelik, Katonqaraǵai ulttyq parkiniń IýNESKO-nyń búkilálemdik biosferalyq rezervattar tizimine, iaǵni erekshe qorǵalatyn aimaqtar tizimine engeni – parktiń táýelsizdik jyldarynda qol jetkizgen basty jetistikteriniń biri.
