Kaspıı teńiziniń Peschanyı múıisi mańynan birneshe aqqýdyń óleksesi tabyldy, dep habarlaıdy Dalanews.kz Lada.kz-ke silteme jasap.
Jergilikti balyq aýlaýmen aınalysatyn turǵynnyń aıtýynsha, ol qysqa ýaqyt ishinde osyndaı jaǵdaıǵa eki ret kýá bolǵan. Onyń sózinshe, jaǵalaýdan shamamen 10-ǵa jýyq aqqýdyń óleksesi anyqtalǵan.
Balyqshy qustardyń qyrylýyna teńiz sýynyń lastanýy sebep bolýy múmkin ekenin alǵa tartady. Ol bul aýmaqta buryn da kemelerden balas sýlardyń tógilgeni birneshe ret tirkelgenin atap ótti.
9 sáýir kúni Jaıyq-Kaspıı óńiraralyq baseındik balyq sharýashylyǵy ınspeksıasynyń mamandary oqıǵa ornyna baryp, jaǵdaıdy tekserýge kiristi.
Aıta keteıik, Kaspıı jaǵalaýynda jyl saıyn ondaǵan ıtbalyq pen ózge de teńiz janýarlarynyń óleksesi tabylyp jatady. Ekologtar men jergilikti turǵyndar bul qubylysty teńizdiń óndiristik qaldyqtarmen jáne keme qatynasynan týyndaıtyn lastanýmen baılanystyrady.
