Budan buryn Maqtaral aýdany «Maqtaly 1» aýylyndaǵy «Azamat» sharýa qojalyǵynyń iesi Tillá Qaldarbekova «Yrys» mikro kredittik uiymynan 4,5 million teńge nesie alyp, bal arany baǵýǵa arnalǵan 2 telejka satyp alǵanyn habarlaǵan edik.
«Azamat» sharýa qojalyǵynyń jumysyn júrgizip otyrǵan Marat Muratovtyń aitýynsha, aralardyń bir uiashyǵynan jylyna 40 litr bal alady eken. Mundaǵy 3 telejkadaǵy 300 uiashyqtan jylyna 15 tonnaǵa jýyq bal alyp jatyr.
«Aralar sýyqqa tózbeidi. Maqtaral aýdanynyń aýa-raiy basqa aimaqtarǵa qaraǵanda áldeqaida jyly ári mundaǵy jaýyn-shashynnyń az bolýy – bal arany baǵýǵa óte qolaily. Sondai-aq, kermek, jantaq, jyńǵyl, maqtanyń gúli siiaqty t.b. aralar nár alatyn ósimdikter munda óte kóp»
- deidi Marat Muratov.
Bal aranyń ónimine degen suranys óte joǵary. Baldy Maqtaraldyń mektepteri men balabaqshalary-aq tolyqtai satyp alady eken. Ónimniń litri – 1000 teńge. Tipti, 4-5 ese qymbat baǵaǵa Qytaidan júz tonna ekologiialyq taza balǵa tapsyrys kelgen. Qojalyq sol suranysty óteý úshin jumys jasap jatyr.
Sondai-aq, «Tehas baly» qaýymdastyǵy da «Azamat» sharýa qojalyǵynyń balyn jii satyp alady.
«Bir uiada bir analyq ara, birneshe júz atalyq Ara jáne 100 myńǵa deiin jumysshy ara bolady. Urǵashy ara uiada urpaq ósiredi. Ol aralardyń ishindegi eń irisi, jyl maýsymyna qarai denesiniń uzyndyǵy 20-25 mm, al salmaǵy 150-300 mg-ge jetedi. Táýligine 2-3 myń, maýsymyna 200 myńǵa jýyq uryqtandyrylǵan jumyrtqa salady. Uryqtanǵan jumyrtqadan urǵashy, jumysshy jáne analyq aralar, al uryqtandyrylmaǵan jumyrtqadan tek erkek aralar shyǵady» – deidi Marat Muratov.
Arany baǵýdyń esh qiyndyǵy joq. Tek kókqus dep atalatyn qustan qoryp, balyn ýaqytynda jinap alyp otyrý kerek eken.
