بۇدان بۇرىن ماقتارال اۋدانى «ماقتالى 1» اۋىلىنداعى «ازامات» شارۋا قوجالىعىنىڭ يەسى ءتىللا قالداربەكوۆا «ىرىس» ميكرو كرەديتتىك ۇيىمىنان 4،5 ميلليون تەڭگە نەسيە الىپ، بال ارانى باعۋعا ارنالعان 2 تەلەجكا ساتىپ العانىن حابارلاعان ەدىك.
«ازامات» شارۋا قوجالىعىنىڭ جۇمىسىن جۇرگىزىپ وتىرعان مارات مۇراتوۆتىڭ ايتۋىنشا، ارالاردىڭ ءبىر ۇياشىعىنان جىلىنا 40 ليتر بال الادى ەكەن. مۇنداعى 3 تەلەجكاداعى 300 ۇياشىقتان جىلىنا 15 تونناعا جۋىق بال الىپ جاتىر.
«ارالار سۋىققا توزبەيدى. ماقتارال اۋدانىنىڭ اۋا-رايى باسقا ايماقتارعا قاراعاندا الدەقايدا جىلى ءارى مۇنداعى جاۋىن-شاشىننىڭ از بولۋى – بال ارانى باعۋعا وتە قولايلى. سونداي-اق، كەرمەك، جانتاق، جىڭعىل، ماقتانىڭ گ ۇلى سياقتى ت.ب. ارالار ءنار الاتىن وسىمدىكتەر مۇندا وتە كوپ»
- دەيدى مارات مۇراتوۆ.
بال ارانىڭ ونىمىنە دەگەن سۇرانىس وتە جوعارى. بالدى ماقتارالدىڭ مەكتەپتەرى مەن بالاباقشالارى-اق تولىقتاي ساتىپ الادى ەكەن. ءونىمنىڭ ءليترى – 1000 تەڭگە. ءتىپتى، 4-5 ەسە قىمبات باعاعا قىتايدان ءجۇز توننا ەكولوگيالىق تازا بالعا تاپسىرىس كەلگەن. قوجالىق سول سۇرانىستى وتەۋ ءۇشىن جۇمىس جاساپ جاتىر.
سونداي-اق، «تەحاس بالى» قاۋىمداستىعى دا «ازامات» شارۋا قوجالىعىنىڭ بالىن ءجيى ساتىپ الادى.
«ءبىر ۇيادا ءبىر انالىق ارا، بىرنەشە ءجۇز اتالىق ارا جانە 100 مىڭعا دەيىن جۇمىسشى ارا بولادى. ۇرعاشى ارا ۇيادا ۇرپاق وسىرەدى. ول ارالاردىڭ ىشىندەگى ەڭ ءىرىسى، جىل ماۋسىمىنا قاراي دەنەسىنىڭ ۇزىندىعى 20-25 مم، ال سالماعى 150-300 مگ-گە جەتەدى. تاۋلىگىنە 2-3 مىڭ، ماۋسىمىنا 200 مىڭعا جۋىق ۇرىقتاندىرىلعان جۇمىرتقا سالادى. ۇرىقتانعان جۇمىرتقادان ۇرعاشى، جۇمىسشى جانە انالىق ارالار، ال ۇرىقتاندىرىلماعان جۇمىرتقادان تەك ەركەك ارالار شىعادى» – دەيدى مارات مۇراتوۆ.
ارانى باعۋدىڭ ەش قيىندىعى جوق. تەك كوكقۇس دەپ اتالاتىن قۇستان قورىپ، بالىن ۋاقىتىندا جيناپ الىپ وتىرۋ كەرەك ەكەن.
