Pavlodar oblysynda káriz qudyǵyndaǵy gazdan ýlanyp qaza bolǵan alty jumysshynyń otbasylaryna materialdyq kómek kórsetiledi. Marqumdardyń nesielerin óteýge járdem berilip, jyl sońyna deiingi jalaqysy tólenedi, dep dalanews.kz tilshisi KTK telearnasyna silteme jasap habarlaidy.
Qaza tapqandar jumys istegen sút fermasy olardyń kámeletke tolmaǵan balalarynyń 18 jasqa tolǵanǵa deiingi kútimi men bilim alý shyǵyndaryn óz moinyna almaq.
Pavlodar oblysynyń ákimi Asaiyn Baihanov qaiǵyly oqiǵa bolǵan jerge baryp, marqumdardyń otbasylaryna kóńil aitty. Óńir basshysy olarǵa memlekettik organdar men jumys berýshi tarapynan jan-jaqty qoldaý kórsetiletinin jetkizdi.
Qaza tapqandardyń úsheýi bir otbasynyń múshesi bolǵan
Qaiǵyly jaǵdai Aqtoǵai aýdanyna qarasty Jolaman aýylynda bolǵan. Káriz qudyǵynda jumys istegen alty adam gazdan ýlanyp, oqiǵa ornynda kóz jumdy.
Marqumdardyń úsheýi bir otbasynyń músheleri – ákesi men onyń eki uly bolǵan. Taǵy bir jumysshy aman qalyp, Aqtoǵai aýdandyq aýrýhanasyna jetkizildi.
Tergeý erekshe baqylaýǵa alyndy
Oblys ákimi Memlekettik eńbek inspektsiiasy komitetiniń departamentine, politsiia men prokýratýraǵa oqiǵany jan-jaqty ári obektivti tergeýdi tapsyrdy.
"Qaiǵyly jaǵdaidyń barlyq mán-jaiyn anyqtap, eńbek qaýipsizdigi talaptaryn buzýǵa jol bergen kináli tulǵalardyń jaýapkershilikten jaltarýyna jol bermeý mindetteldi", – dedi Pavlodar oblysy ákiminiń baspasóz qyzmetiniń ókili Janserik Qapzolla.
Qazirgi ýaqytta oqiǵanyń naqty sebepteri men kásiporynda qaýipsizdik talaptarynyń qalai saqtalǵany tekserilip jatyr.
