2026 jylǵy 3 qyrkúiekte Almaty qalasynda halyqaralyq qatysýmen ótken IX Respýblikalyq arteriialyq gipertoniia jáne kardiovaskýliarlyq profilaktika boiynsha kongress — CARDIO formQZ «Jańa baǵdarlar. Tekserilgen marshrýttar. Klinikalyq sheshimder» atty is-sharanyń ashylýy ótti. Kongress kardiologiia jáne meditsinalyq-sanitariialyq alǵashqy kómek salasyndaǵy jetekshi mamandardyń basyn qosty, dep habarlaidy dalanews.kz.
Kongresti «Kardiologiia jáne ishki aýrýlar ǵylymi-zertteý institýty» AQ Basqarma tóraǵasy Rýstem Muhtaruly Tóleýtaev ashty. Óz sózinde ol júrek-qan tamyrlary aýrýlarynyń aldyn alýdyń, qaýip faktorlaryn erte anyqtaýdyń jáne bastapqy býyn men mamandandyrylǵan kardiologiialyq qyzmet arasyndaǵy sabaqtastyqty kúsheitýdiń erekshe mańyzdylyǵyn atap ótti. Qazaqstannyń barlyq óńirlerinde patsientterdiń profilaktikasy men olardy júrgizýdiń biryńǵai tásilderin qurý qajettigine basa nazar aýdaryldy.
Kongress tarihynda alǵash ret osyndai mańyzdy ári aýqymdy is-sharaǵa Polsha, Gdansk qalasy Polsha ǵylym akademiiasynyń (PAU) múshesi, Eýropalyq gipertoniia qoǵamynyń (ESH) prezidenti, meditsina doktory (MD), professor Andjei Ianýshevich (Andrzej Januszewicz) qatysty. Óz baiandamasynda professor arteriialyq gipertoniiany basqarý jáne onyń profilaktikasy baǵytyndaǵy Qazaqstannyń róline, sondai-aq qol jetkizilgen negizgi kórsetkishterge toqtaldy.
Kongress spikerleri qatarynda Qoǵam tóraǵasy G.L. Djýnýsbekova, onyń orynbasary M.K. Týndybaeva, Kardiologiia jáne ishki aýrýlar ǵylymi-zertteý institýty Basqarma tóraǵasynyń orynbasarlary D.A. Qaibýllaeva, G.A. Toǵyzbaev, sondai-aq arteriialyq gipertoniia salasyndaǵy jetekshi mamandar sóz sóiledi.
Kúnniń ekinshi jartysynda shtattan tys bas kardiologtar men meditsinalyq-sanitariialyq alǵashqy kómek (MSAK) kórsetý salasynyń bas mamandarynyń keńesi ótti. Keńes moderatory Rýstem Týleýtaev boldy.
Keńes barysynda óńirlermen ózara is-qimyl, Kardiologiia jáne ishki aýrýlar ǵylymi-zertteý institýty tarapynan óńirlik densaýlyq saqtaý basqarmalary men meditsinalyq uiymdarǵa uiymdastyrýshylyq-ádistemelik kómek kórsetý, MSAK deńgeiinde kardiovaskýliarlyq profilaktikany jetildirý, júrek-qantamyr qaýpi joǵary patsientterdi erte anyqtaý, patsientterdi meditsinalyq kómek kórsetý deńgeileri boiynsha durys baǵyttaý jáne meditsinalyq kómektiń sabaqtastyǵyn qamtamasyz etý máseleleri talqylandy.
Qazaqstan Respýblikasynda qanainalym júiesi aýrýlary kezinde meditsinalyq kómek kórsetýdi jetildirý jónindegi QR Densaýlyq saqtaý ministrliginiń 2027–2030 jyldarǵa arnalǵan Jol kartasyn iske asyrý aiasynda Qazaqstan óńirlerimen uiymdastyrylǵan ashyq kásibi dialog barysynda ózekti máseleler aiqyndalyp, júrek-qantamyr aýrýlarynyń profilaktikasynyń tiimdiligin arttyrýǵa jáne Qazaqstan halqyna kórsetiletin kardiologiialyq kómektiń sapasyn jaqsartýǵa baǵyttalǵan odan ári birlesken jumystyń negizgi baǵyttary belgilendi.
