Álemge áigili amerikalyq reper Kane Ýest araǵa 13 jyl salyp Qazaqstanǵa qaita kelýge daiyndalyp jatyr. Bul joly ol jabyq keshte emes, Almatydaǵy Ortalyq stadionda myńdaǵan jankúierdiń aldynda óner kórsetpek, dep habarlaidy dalanews.kz.
Kontsert 2026 jylǵy 14 tamyzǵa josparlanǵan. Almaty ákimdigi sharaǵa qatysty aqparatty rastaǵan. Uiymdastyrýshylardyń málimetinshe, kontserttiń ótetin kúni men orny ázirge ózgermegen.
Bilet satylymy bastapqy jospardan bir kúnge keiinge shegerilip, 21 shilde saǵat 12:00-ge aýystyrylǵan. Buǵan «Qairat» fýtbol klýbymen bailanysty uiymdastyrýshylyq máseleni talqylaý sebep bolǵan.
Kane Ýest Qazaqstanǵa buryn da kelgen
Bul reperdiń Qazaqstanǵa alǵashqy sapary emes. 2013 jylǵy 31 tamyzda Kane Ýest Almatydaǵy Royal Tulip qonaqúiinde ótken Aisultan Nazarbaev pen Álima Boranbaevanyń úilený toiynda óner kórsetken.
Jabyq keshten túsirilgen kadrlar keiin áleýmettik jelige tarap, oqiǵa sheteldik BAQ-tyń da nazaryn aýdardy.
Sol kezde birqatar sheteldik basylym reperdiń toidaǵy óneri úshin 3 million dollarǵa deiin gonorar alǵanyn jazǵan. Alaida bul soma resmi túrde rastalmady. Kane Ýestiń sol kezdegi prezident Nursultan Nazarbaevtyń shaqyrtýymen kelgeni týraly da aqparat taraǵanymen, oǵan qatysty resmi túsinikteme bolmaǵan.
Aisultan Nazarbaev ol kezeńde Qazaqstannyń tuńǵysh prezidentiniń kópshilikke tanymal nemereleriniń biri edi. Álemdik deńgeidegi juldyzdyń onyń úilený toiyna shaqyrylýy qoǵamda keńinen talqylanyp, sán-saltanat pen shyǵyn kólemine qatysty túrli pikir týǵyzǵan.
13 jylda kóp nárse ózgerdi
Sodan beri Qazaqstannyń saiasi ómirinde de, Nazarbaevtar áýletinde de aitarlyqtai ózgerister boldy.
Nursultan Nazarbaev 2019 jylǵy 19 naýryzda prezidenttik ókiletin toqtatatynyn málimdedi. Al 2022 jylǵy Qańtar oqiǵasynan keiin onyń birqatar resmi mártebeleri men ókiletteri toqtatyldy.
Aisultan Nazarbaev 2020 jylǵy 16 tamyzda Londonda 29 jasynda qaitys boldy.
Endi Kane Ýest Qazaqstanǵa múlde basqa formatta oralmaq. 2013 jyly onyń ónerin tek jabyq toi qonaqtary tamashalasa, bul joly kontsert kópshilikke arnalǵan.
Uiymdastyrýshylardyń alǵashqy málimeti boiynsha, bilet baǵasy 120 myńnan 350 myń teńgege deiin belgilengen.
Almatydaǵy shoý Ye-diń álemdik týry aiasynda ótýi josparlanyp otyr. Kontsert baǵdarlamasyna onyń ár jyldary jaryq kórgen tanymal ánderi enýi múmkin. Reperdiń sońǵy kontsertterindegi basty erekshelikterdiń biri – aýqymdy vizýaldy qoiylymdar men sahnalyq sheshimder.
