Reseidiń Kamchatka túbeginde sońǵy 70 jylda bolmaǵan, magnitýdasy 8,8 balǵa jetken asa kúshti jer silkinisi kezinde Petropavl-Kamchatskii qalasyndaǵy onkologiialyq dispanserdiń dárigerleri naýqasqa operatsiia jasap jatqan edi.
Dárigerler jumysty úzbei, operatsiiany sátti aiaqtap shyqty. Osy operatsiiany júrgizgen dárigerlerdiń biri, onkolog Liýbov Tsyplakova oqiǵa barysyn jáne narkozdan oianǵan patsienttiń reaktsiiasyn reseilik RBK agenttigine baiandap berdi, dep habarlaidy Dalanews.kz.
Jer silkinisi bastalǵan sátte dárigerler patsientke ota jasap jatqanyna bir saǵattan asqan edi. Bul kezde operatsiianyń negizgi ári kúrdeli bóligi aiaqtalyp, isik tolyq alynǵan. Qatty dúmpýler bastalǵanda, dárigerler sabyr saqtap, operatsiiany jalǵastyrýǵa bel bailaǵan.
«Bizde eshqandai dúrbeleń bolǵan joq. Isikti alyp bolǵanbyz, endi operatsiiany sońyna deiin jetkizý kerek dep sheshtik. Negizgi jumystyń bári bitip, jarty saǵattyq jumys ǵana qalǵan bolatyn», – deidi dáriger Tsyplakova.
Dárigerdiń aitýynsha, ujymnyń birligi men kásibiliginiń arqasynda operatsiiany qiyn jaǵdaida jalǵastyrý múmkin bolǵan.
«Bizdiń ujym bul sátte erekshe birlik tanytty. Qumyrsqalar óz ileýinde qalai jumys isteitin bolsa, biz de solai, árkim óz mindetin bildi. Birimiz aspaptardy ustadyq, birimiz patsientti qadaǵaladyq, endi birimiz apparattyń jumysyn baqylaýda ustadyq», – dep eske alady onkolog.
Tsyplakovanyń aitýynsha, osy operatsiiaǵa jaýapty anesteziolog maman naýqastyń tynys alýy men preparattyń úzdiksiz berilýin erekshe qadaǵalap turǵan.
«Anesteziolog naýqasty jiti baqylap, preparattar men qurylǵylardyń durys jumys isteýin qamtamasyz etti. Patsienttiń tynysy qalypty, jaǵdaiy turaqty bolýy úshin bar kúshin saldy», – deidi dáriger.
Dárigerlerdiń aitýynsha, operatsiia kezinde eshqandai úrei baiqalmaǵan. Óitkeni bul jergilikti meditsina qyzmetkerleri úshin alǵashqy jer silkinisi emes. Biraq bul jolǵy tabiǵi apat burynǵylardan áldeqaida kúshti bolǵan.
«Shynyn aitqanda, qorqynysh operatsiia bitken soń ǵana sezile bastady. Bul, bálkim, oqiǵadan keiingi psihologiialyq reaktsiia shyǵar», – deidi Tsyplakova.
Operatsiiadan soń patsient te esin jiyp, oǵan jer silkinisi bolǵany týraly aitylǵan.
«Patsienttiń jaǵdaiy bárinen jaqsy boldy. Oǵan búgin ǵana jer silkinisi kezinde operatsiiada bolǵanyn aitqan kezde, ol sener-senbesin bilmedi. Bireý qaljyńdap: «Siz ol kezde uiyqtap jattyńyz ǵoi, bári túsińizde bolǵan», – dedi. Ol bastapqyda shynymen tań qalyp, keiin mán-jaidy túsingen soń qalypty qabyldady», – dep baiandaidy dáriger.
Dárigerdiń aitýynsha, bul oqiǵa týraly aldyn-ala eshqandai eskertý bolmaǵan. Alaida dispanserde tótenshe jaǵdailar kezinde áreket etý boiynsha nusqaýlyqtar únemi ótkizilip turady eken. Ǵimarat ishinde «Qaýipsiz oryn» dep jazylǵan arnaiy belgiler ornatylǵan.
Kamchatka óńiriniń gýbernatory Vladimir Solodov osy oqiǵaǵa bailanysty operatsiiany toqtatpai jalǵastyrǵan dárigerlerge memlekettik nagrada taǵaiyndaý týraly tapsyrma bergen.
Resei Ǵylym Akademiiasynyń Geofizika qyzmetiniń Kamchatkadaǵy filialynyń málimeti boiynsha, 30 shildede bolǵan bul jer silkinisi 1952 jyldan beri aimaqta tirkelgen eń iri seismikalyq oqiǵa. Gýbernator Vladimir Solodov magnitýdanyń 8,8 balǵa jetkenin, bul – aspaptyq baqylaý kezeńindegi eń qýatty jer silkinisi ekenin málimdedi. Jer silkinisi saldarynan Avacha shyǵanaǵy jaǵalaýynda tsýnami qaýpi jariialandy.
Osyǵan uqsas magnitýdasy 7,9 baldyq jer silkinisi Soltústik Kýrilsk aýdanynda da tirkelgen. Sahalin oblysynyń gýbernatory Valerii Limarenko bul aimaqta da tsýnami qaýpi jariialanǵanyn habarlaǵan.
Petropavl-Kamchatskii qalasynda jer silkinisinen keiin №15 balabaqshanyń ǵimaraty zardap shekti. Abyroi bolǵanda, ǵimarat jóndeý jumystaryna bailanysty jabyq bolyp, ishinde bala bolmaǵan. Sondai-aq, qyzmetkerler arasynda zardap shekkender joq.
Qazir Kamchatka óńirinde tótenshe jaǵdai saldaryn joiý jumystary jalǵasyp jatyr.
