Aqtóbe oblysynda Ádep jónindegi keńes Qandyaǵash qalasynyń ákimi Qazbek Aqqaiyrdyń tártibin qarady. Oǵan kabinetine kelgen turǵyndy julqylap qýyp shyqqany úshin qatań sógis berildi, dep habarlaidy Dalanews.kz.
Ákimniń bul áreketi memlekettik qyzmetker etikasyna qaishy dep tanylyp, qoǵamda teris pikir týdyrdy. Alǵashynda aiyptaýlardy joqqa shyǵarǵan sheneýnikke óziniń daýysy jazylǵan aýdiojazba tyńdatyldy.
“Siz – laýazymdy tulǵasyz. “Moiyndamaimyn” degenińiz jaraspaidy. Jumys ornyńyzda otyrǵannan keiin azamattardyń suraǵyna baiyppen jaýap berýińiz kerek. Al siz BAQ ókiline “men shyǵaryp jiberdim” dep maqtanasyz. Bul qalai? Biz estip, kórip otyrmyz. Eger qol jumsap, zaqym keltirgen bolsańyz, múlde basqa jaýapkershilikke tartylar edińiz. Ádep normalaryn saqtaý – memlekettik qyzmetkerdiń basty mindeti. Bul jaǵdai qaitalansa, qyzmetten ketýge týra keledi”, – dedi Ádep keńesiniń tóraǵasy.
Keńes músheleri ákimge qatań sógis berý týraly sheshimdi biraýyzdan maquldady. Sonymen qatar, oǵan halyqpen qarym-qatynasta sabyrly bolý, emotsiiaǵa berilmeý kerektigi eskertildi.
Aita keteiik, Qazbek Aqqaiyr 2024 jyldyń shilde aiynda Qandyaǵash qalasynyń ákimi bolyp sailanǵan.
