اقتٶبە وبلىسىندا ەدەپ جٶنٸندەگٸ كەڭەس قاندىاعاش قالاسىنىڭ ەكٸمٸ قازبەك اققايىردىڭ تەرتٸبٸن قارادى. وعان كابينەتٸنە كەلگەن تۇرعىندى جۇلقىلاپ قۋىپ شىققانى ٷشٸن قاتاڭ سٶگٸس بەرٸلدٸ, دەپ حابارلايدى Dalanews.kz.
ەكٸمنٸڭ بۇل ەرەكەتٸ مەملەكەتتٸك قىزمەتكەر ەتيكاسىنا قايشى دەپ تانىلىپ, قوعامدا تەرٸس پٸكٸر تۋدىردى. العاشىندا ايىپتاۋلاردى جوققا شىعارعان شەنەۋنٸككە ٶزٸنٸڭ داۋىسى جازىلعان اۋديوجازبا تىڭداتىلدى.
“سٸز – لاۋازىمدى تۇلعاسىز. “مويىندامايمىن” دەگەنٸڭٸز جاراسپايدى. جۇمىس ورنىڭىزدا وتىرعاننان كەيٸن ازاماتتاردىڭ سۇراعىنا بايىپپەن جاۋاپ بەرۋٸڭٸز كەرەك. ال سٸز باق ٶكٸلٸنە “مەن شىعارىپ جٸبەردٸم” دەپ ماقتاناسىز. بۇل قالاي? بٸز ەستٸپ, كٶرٸپ وتىرمىز. ەگەر قول جۇمساپ, زاقىم كەلتٸرگەن بولساڭىز, مٷلدە باسقا جاۋاپكەرشٸلٸككە تارتىلار ەدٸڭٸز. ەدەپ نورمالارىن ساقتاۋ – مەملەكەتتٸك قىزمەتكەردٸڭ باستى مٸندەتٸ. بۇل جاعداي قايتالانسا, قىزمەتتەن كەتۋگە تۋرا كەلەدٸ”, – دەدٸ ەدەپ كەڭەسٸنٸڭ تٶراعاسى.
كەڭەس مٷشەلەرٸ ەكٸمگە قاتاڭ سٶگٸس بەرۋ تۋرالى شەشٸمدٸ بٸراۋىزدان ماقۇلدادى. سونىمەن قاتار, وعان حالىقپەن قارىم-قاتىناستا سابىرلى بولۋ, ەموتسيياعا بەرٸلمەۋ كەرەكتٸگٸ ەسكەرتٸلدٸ.
ايتا كەتەيٸك, قازبەك اققايىر 2024 جىلدىڭ شٸلدە ايىندا قاندىاعاش قالاسىنىڭ ەكٸمٸ بولىپ سايلانعان.
