Áleýmettik jelide buǵan deiin "gúl urysy" retinde tanymal bolǵan burynǵy politsiia qyzmetkeriniń taǵy bir videosy tarap ketken edi. Osy joly ol mekemede áieldiń telefonyn tartyp alǵany aitylady. Politseiler onyń buǵan deiingi isi qalai aiaqtalǵanyn aitty, - dep habarlaidy Dalanews.kz.
Oǵan qatysty birinshi oqiǵa 2023 jyly mamyrda boldy. Bul video da áleýmettik jelide tarap ketti: er adam salonnan gúl shoǵyn alyp ketedi, oǵan qosa floristti iterip jiberedi.
Keiinirek video keiipkeri 2023 jyly 19 mamyrda politsiia qatarynan óz erkimen berilgen raportqa sáikes ketken Qarataý aýdandyq politsiia basqarmasynyń burynǵy qyzmetkeri ekeni belgili boldy. Gúl dúkeninde bolǵan oqiǵaǵa qatysty "Tonaý" baby boiynsha is bastaldy.
"Áleýmettik jelilerde jariialanǵan video materialdardy taldaý nátijesinde Turan aýdany Politsiia basqarmasy aitylǵan derek boiynsha QK-niń 191-babynda, 2-bóliginde, 1-tarmaǵynda kózdelgen qylmystyq quqyqbuzýshylyq belgileri boiynsha sotaldy tergeý bastady jáne Shymkent politsiia departamentine jiberildi. Osy qylmystyq is boiynsha qajet tergeý jedel is-sharalary júrgizilip jatyr, onyń nátijeleri boiynsha zańdy is júrgizý sheshimin qabyldai otyryp, kináli adamdardyń is-áreketterine quqyqtyq baǵa beriledi", - delingen edi sol kezde Shymkent prokýratýrasy habarlamasynda.
Burynǵy politseige qatysty ekinshi oqiǵa jaqyn kúnderi Shymkent qalasyndaǵy meiramhanalardyń birinde boldy. Telefonyn qaitarýdy suraǵan áielge eks-politsiia qyzmetkeri jaýap bermeidi.
"Ákel telefonymdy. Telefondy alyp kel dedim saǵan! Ishkenińe tólei almaisyń ǵoi qazir. ...Myna kisi aityp jatyr me edińder? Ishkenine tólep alsyn. Meniń telefonymdy kepilge tastamaqshy. Jaqsylap telefonǵa túsirshi. Sol gúlge aqsha tólei almaityn jigit qoi", - dedi videoda áiel.
Kadrlardan oqiǵa kýágerleri áielge kómekteskisi kelgeni kórinedi. Alaida er adam olardyń da sózine qulaq aspaidy.
“Meniń telefonym, sony ala sal. Saǵan syiladym. Mende telefon joq, kólikte”, – deidi er adam.
Sonymen qatar, jeli qoldanýshylary eks-politsei basqa adamdardyń zattaryn alyp qoiatyn ádetin qoimaǵanyna ashynǵan.
Keshe quqyq qorǵaý organynyń burynǵy qyzmetkerine qatysty is toqtatylǵany belgili boldy.
"Oǵan qatysty buryn tirkelgen qylmystyq is qylmys quramy bolmaýyna bailanysty toqtatyldy. Sheshimdi Shymkent prokýratýrasy kelisip, bekitken", - dep jaýap berdi Shymkent politsiia departamentiniń baspasóz qyzmeti ókilderi Tengrinews.kz-ke.
Sonymen qatar, politseiler jaqyn arada bolǵan oqiǵaǵa qatysty da pikir bildirgen edi.
"Bul derek boiynsha politsiiaǵa eshqandai aryz túsken joq. Qazir oqiǵanyń mán-jaiyn anyqtaý úshin videoda kórsetilgen adamdardy anyqtaý boiynsha jumys júrgizilip jatyr.
Sonymen qatar, M. Bekov Ishki ister organdary qyzmetkeri emes ekenin habarlaimyz", - dep jazylǵan Shymkent Politsiia departamentiniń baspasóz qyzmetiniń habarlamasynda.
