Prezident Qasym-Jomart Toqaev Qazaqstan halqyna joldaýynda vagondardyń jai-kúii týraly aitty, dep habarlaidy Dalanews.kz.
"Jurttyń vagondardyń jai-kúiine kóńili tolmaidy. Astanada vagon qurastyratyn zaýyt iske qosyldy. Bul osy saladaǵy ózekti máselelerdi sheshý úshin jasalǵan mańyzdy qadam boldy. Ozyq halyqaralyq standartqa sai jabdyqtalǵan zamanaýi jolaýshylar vagonyn jasaý shetel investorynyń qatysýymen qolǵa alynady", - dedi Toqaev.
Memleket basshysy keiingi jyldary aviatsiia infraqurylymyn jańǵyrtý úshin kóp jumys istelgenin jetkizdi.
"Byltyr Almaty, Shymkent, Qyzylorda qalalarynda jańa terminaldar ashyldy. Jaqynda Zaisanda, Qatonqaraǵai jáne Kendirlide áýejai qurylysy aiaqtalady. Arqalyq áýejaiy qalpyna keltirilip jatyr. Bul jobalar aimaqtardyń ekonomikalyq belsendiligin arttyrýǵa yqpal etedi, jańa jumys oryndaryn ashýǵa múmkindik beredi, sondai-aq, basqa da birqatar salanyń damýyna serpin beredi. Sondyqtan bul jumys óz jalǵasyn tabady", - dedi Prezident.
Qasym-Jomart Toqaev Qazaqstan Eýraziiadaǵy kólik haby bolýǵa tiis ekenin, bul strategiialyq mańyzy zor mindet ekenin aitty.
"Bul jumysqa osy salada tabysqa jetken úzdik mamandar men kásipkerlerdi tartý kerek. Biraq negizgi jaýapkershilik Úkimette. Tapsyrmanyń oryndalý barysyn jyldyń basynda Úkimettiń jyldyq esebinen keiin arnaiy jinalysta qaraimyz", - dedi Toqaev.
